分类： 賽車資訊

2026 F1新規則新賽季未開波就已經玩到咁顛？目前形勢四大引擎陣營，平治(Mercedes)、紅牛福特、法拉利(Ferrari)以及重回圍場的本田。已知消息系平治、紅牛通過可變壓縮比技術，繞過FIA壓縮比16嘅規則上限，超壓到18，換算成馬力可能多達30匹，換算成圈速則快0.3-0.4秒。

所以法拉利、本田嘅引擎就咁算？由得對手領先？本田引擎目前只供應馬丁(Aston Martin)一支車隊，並不需要為交代客戶車隊去公開任何研發進度(分分鐘本田才是真正領先者，隱藏實力而已)。而法拉利引擎，擁有Haas、奧迪(Audi)以及凱迪拉克(Cadillac)三支客戶車隊。所以壓力比到法拉利咧邊，必須向客戶交代，必須回應！

法拉利帶來嘅又未必都系壞消息啵！其中最大利好，法拉利系目前唯一可以不超過限重768KG嘅車隊，當然減重嘅功臣必然系引擎部門啦！法拉利通過對引擎以及主要系波箱箱體、波箱外殼等結構大動干戈，做到唔單止波箱大幅輕量化，同時做到波箱尺寸非常緊緻，為空氣動力佈局讓出了更大窗口，未來可期！

至於輕量化優勢，可以參考2022年上一次規則大改嘅第一年，法拉利客戶車隊愛快·羅密歐(Alfa Romeo)，得益於全員超重嘅情況下，輕裝上陣，喺賽季初展示出不輸豪門平治車隊嘅速度。同時，要記住2022系法拉利和紅牛打得有來有回的精彩一年。

雖然法拉利引擎仲公佈了部分技術細節，例如低阻力機件技術、更高效的充電方案、同樣緊湊的電機為輕量化以及空力佈局帶來優勢等等。目前最新進度系，引擎未點火但準備點火(已落後於其他車隊)，但車依然還在台架上，且唔見任何空力套件覆蓋(未設計好？)甚至有傳聞法拉利要放棄本月26日喺巴塞隆拿嘅寶貴季前測試時間去研究部車。

鐵佛寺(Tifosi)不需要悲傷，筆者更傾向於兩睇。法拉利既獲得輕量化優勢，而空力套件又未做好，可能確實得益於機械部分嘅緊湊設計理念，空力可塑窗口太大，需要時間去搵最佳空力效果。

圖片均來自網絡以及F1車隊官方，觀點僅代表作者個人；如果冒犯倍感抱歉，請立刻聯繫我們。

重磅消息！法拉利（Ferrari）F1車隊在新年2026的1月2日下午官宣周冠宇離隊，配文：期約已至，感恩「宇」你相伴。周正式結束了法拉利儲備車手的工作。

緊接重磅！F1第11支新車隊凱迪拉克（Cadillac），同日夜晚官宣咗一張神秘貓貓海報，並配文：眼神不會說謊，未來已然預料。有眼尖嘅車迷認出，這隻貓貓就係周冠宇的寵物「玉米粒」，因為貓眼反光上出現了車號24！（周冠宇的車號）緊接，凱迪拉克F1車隊喺1月3日就發佈了視頻，官宣周冠宇入隊！

其實咧件事有小小峰迴路轉但又預料之中。關於周冠宇係法拉利的前途，明眼可見並不樂觀，正式車手陸克萊（LEC）以及咸美頓（HAM）多年合約鎖死戶口，靚仔新人王比亞文喺哈斯車隊（Hass）歷練大升級隨時準備晉升，後面仲有更年輕的陸克萊親弟弟……再多嘴講句義大利國企性質，歐洲體制內對亞洲員工的普遍態度，周冠宇的未來將會係無止境的穩座「鐵板凳」。

對比翻凱迪拉克F1車隊，雖然新車隊一切重零開始，但係車隊剛剛公佈要喺2月8日的美國頂流「超級碗」直播中公佈新車塗裝，可見車隊實力不俗。再加之，周冠宇的前經紀人格雷姆·洛登（下左）直接擔任車隊領隊；坐擁佩雷斯、保達斯兩大最頂級冠軍副將作為師傅教揸車；凱迪拉克使用的法拉利引擎，而周擁有圍場內最多的法拉利模擬器時長；再有國際上中美關係加速回暖政治路線正確，凱迪拉克看漲中國豪華車市場等等利好條件。周冠宇今次係隊內可謂眾星捧月，中國車迷戲稱周冠宇唔係儲備車手咁簡單，而係「儲君」。

凱迪拉克（Cadillac）將在2026年以第11支車隊的身份正式進軍一級方程式（F1）賽場，成為自2016年以來首支新增的美國車隊，初期會使用法拉利動力單元，並計畫在2028年推出自研引擎，這代表著通用汽車（GM）在F1長期投入，展示其工程實力並拓展全球品牌影響力。

主要亮點
參賽時間：2026年賽季開始。
運營方：由美國賽車公司TWG動力運動（TWG Motorsports）運營。
動力單元：2026-2027賽季：使用現有供應商（法拉利）的動力單元。
2028賽季起：推出自主研發的動力單元，成為「正廠隊」。
目標：展示通用汽車的技術領導力，為全球車迷帶來激情，並在高端賽車領域重塑美國品牌形象。
合作夥伴：與Andretti車隊有合作關係，並將利用其現有資源。

繼哈斯（Haas）之後，凱迪拉克是近年來首支加入F1的美國車隊。此舉是通用汽車展示其在電動化和混合動力技術方面的實力，透過F1的全球舞台來推廣其品牌。主要工程團隊設於英國銀石，另在美國印第安納州和密歇根州設有部門。已簽下經驗豐富的老將Sergio Pérez（佩雷斯）和Valtteri Bottas（保達斯），利用他們豐富的經驗來建設車隊。總體而言，凱迪拉克F1車隊的加入為F1帶來了新的美國力量和品牌活力，預計將在未來幾年成為賽場上值得關注的焦點。

圖片均來自網絡，觀點僅代表作者個人；如果冒犯倍感抱歉，請立刻聯繫我們。

首先係2025 F1收官戰阿布扎比，迎來F1歷史上全新嘅車手世界冠軍——Lando Norris蘭度羅禮士（NOR）。

NOR係F1歷史上第35個世界冠軍

NOR係第11個英國國籍F1世界冠軍

NOR係麥拿倫車隊繼2008年之後第一個車手世界冠軍，無錯上一個係咸美頓（HAM）

NOR 7年職業生涯之後奪冠，而且7年都係麥拿倫車隊擔任正式車手

不過今次奪冠過程真係非常驚險，雖然帶著12分差嘅優勢進入終局，但最終結果都只係險勝4冠王紅牛車隊韋斯特賓（VER）2分而已。

回顧上站卡塔爾平治新人王安東尼利（ANT），最後圈失誤讓出2分比NOR被全網網暴事件，不禁又令人事後再驚出冷汗。畢竟今日VER屬於Pole to Win收官，奪得2025 F1賽季最多冠軍數以及桿位數，都係8個，即使最終同分NOR都不足以勝出。險勝2分，網暴有理！

至於另個一非常重要，有機會左右WDC走向嘅車手，居然係已經宣佈離隊嘅紅牛車隊二號車手角田裕毅（TSU）。排位賽日本人就少有殺入Q3並為左VER嘅桿位，放棄所有全力準備幫助VER喺大直路拉尾流。結果當然係成功將VER拉成桿位。

不過正賽紅牛車隊策略都非常明顯，TSU硬胎起步壓制黃胎提前入站嘅NOR，企圖復刻2021年佩雷斯壓制HAM整整7秒奠定VER首冠咁。TSU係電台積極回復車隊「交俾我喇！」結果係一條大直路都壓制唔到，自己仲喜提5秒罰時，理由係將多次變線將NOR推出賽道。

至於嬲嬲豬嘅麥拿倫車手皮亞斯特利（PIA），嬲到收官戰第一圈就做低隊友NOR，搞到策略被動全程只能死守P3，硬抗無啦啦彈起嘅法拉利路克萊（LEC）。

同NOR同樣係本賽季贏咗7個分站冠軍，雖然有評論認為其表現優於NOR更加激進，擁有更強大嘅戰鬥慾望以及能力，但係始終係揸唔就手嘅賽道過於不穩定而丟失WDC。當然，所有車迷都會認為上站卡塔爾係車隊愚蠢嘅策略整唔見PIA嘅分站冠軍噶！

完結散花，感謝陪伴！2025賽季完美詮釋咗咩叫：直到最後一刻都有不確定性。F1 2025係繼2021之後最精彩繽紛嘅一個賽季，同時都係地面效應空力規則（2022-2025）嘅最後一個賽季，同時又係歷史最巨型F1賽車嘅最後一個賽季。2026年開始，F1比賽將進入小型化+油電混合動力+主動空力時代，新一輪嘅規則元年註定大混亂，三個月後準時開波。

2025 Drivers’ Standings

Pos.	Driver	Nationality	Team	Pts.
1	Lando Norris	GBR	McLaren	423
2	Max Verstappen	NED	Red Bull Racing	421
3	Oscar Piastri	AUS	McLaren	410
4	George Russell	GBR	Mercedes	319
5	Charles Leclerc	MON	Ferrari	242
6	Lewis Hamilton	GBR	Ferrari	156
7	Kimi Antonelli	ITA	Mercedes	150
8	Alexander Albon	THA	Williams	73
9	Carlos Sainz	ESP	Williams	64
10	Fernando Alonso	ESP	Aston Martin	56
11	Nico Hulkenberg	GER	Kick Sauber	51
12	Isack Hadjar	FRA	Racing Bulls	51
13	Oliver Bearman	GBR	Haas F1 Team	41
14	Liam Lawson	NZL	Racing Bulls	38
15	Esteban Ocon	FRA	Haas F1 Team	38
16	Lance Stroll	CAN	Aston Martin	33
17	Yuki Tsunoda	JPN	Red Bull Racing	33
18	Pierre Gasly	FRA	Alpine	22
19	Gabriel Bortoleto	BRA	Kick Sauber	19
20	Franco Colapinto	ARG	Alpine	0
21	Jack Doohan	AUS	Alpine	0

圖片均來自網絡，觀點僅代表作者個人；如果冒犯倍感抱歉，請立刻聯繫我們。

因為參考歷史原因，喺2025 F1卡塔爾站，FIA正式引入了類似於蒙地卡羅嘅25圈內強制入站，從而達到了保護輪胎提升比賽安全性嘅指令。不過咧，喺2025尚未決出WDC嘅倒數第二站，呢個看似無聊嘅安全指令，又貌似變成咗一個不大不小嘅變數。

其實2025卡塔爾站本身個看點就唔複雜嘎！由週五衝刺賽排位開始積分領跑嘅麥拿倫就順風順水，追分者紅牛車隊韋斯特賓（VER）各種不順，始終慢半秒，頭排都上唔到。睇形勢就麥拿倫內鬥爭冠，連續頹廢嘅81號皮亞斯特利（PIA）終於喺高抓地賽道壓制隊友4號仔羅禮士（NOR）。順利嘅話，VER會提前失去爭冠希望，而PIA同NOR甚至可能個位數分差進入收官。

又回到靈魂拷問：你相信劇本嘛？但事情就係咁有趣，P1發車嘅PIA喺正賽57圈正賽嘅關鍵圈第7圈，大會全場派發免費入站劵——安全車出動，事因車陣後方碰撞有車損。由於開頭提到，本站25圈內強制入站，於是面臨一個不太難嘅優惠選擇：

A、享受優惠，第7圈安全車期間完全免費入站，條件係，剩餘50圈剛好兩個上限Stin，即係準確要第32圈入多一次站，避免觸發25圈嘅超限違規。

B，不享受折扣，換取更靈活嘅入站策略。同埋搏下一次安全車。

但係事實上就係，除了麥拿倫車隊，所有車隊都選擇了免費派送嘅入站折扣劵，而犧牲入站靈活性。傲慢的麥拿倫，認為自己仲係火星車，可以喺50圈比賽中輕鬆拉出一個26秒嘅入站窗口。即係平均一圈拉開半秒以上，仲要計埋超車，仲要入多人地一次站。個種感覺咧，正正好似2021年，五盞紅燈熄滅，只有劉爵士起步嘅名場面。

可能係排位賽確實有半秒優勢在手，搞到策略組真係夠膽死攞WDC來賭博。甚至因為木瓜規則（公平競爭）就連兩個車手之間嘅差異化策略，即兩頭押，都懶得去做。結局就係，PIA跌落車陣當中，超車導致輪胎提前耗盡，無法貼近免費入站上升P1嘅VER（VER全力Push防守）。最後PIA P2，直到最後一圈距離VER嘅秒差仲有10秒+，充分暴露麥拿倫堪憂嘅數學水平！

積分榜首嘅NOR更慘，完全被其他車隊壓制，喺P5位置捱到最後一圈，先借助前車平治車隊新人王安東尼利（ANT）自己失誤超翻到P4止損。事後仲引發全民網暴話麥拿倫作為平治引擎嘅客戶車隊，ANT故意讓車，平治車隊收到神秘電話等等鬧劇。

而結局就係，面對免費折扣麥拿倫仲猶猶豫豫，紅牛策略組就成為咗第一個正確使用免費劵嘅車對，並幫助VER登上卡塔爾的冠軍寶座。神奇就係威廉士都因為正確使用入站免費劵，小車隊成功逆襲登上領獎台，甚至成功壓制麥拿倫嘅NOR。

於是到收官站阿布扎比之前，VER強行將2025大結局拉入三人爭WDC嘅局面。目前NOR僅有12分優勢，VER積分反超PIA 4分。VER終於逼到麥拿倫車隊：本該是從從容容游刃有餘，現在匆匆忙忙連滾帶爬，完全無曬任何犯錯空間。如果今次卡塔爾嘅失誤喺收官站再次復現，麥拿倫有可能會失去車手WDC。

圖片均來自網絡，觀點僅代表作者個人；如果冒犯倍感抱歉，請立刻聯繫我們。

一直被一個靈魂拷問困擾住「究竟F1有無劇本？」我相信係無噶！因為作為體育競技F1已經足夠精彩，當然除咗當年個別車隊企圖操控賽果並面臨官非。不過今站賭城拉斯維加斯街道賽，比賽確實几無聊，但賽後一紙判決書，貌似一只無形大手，無聲咁Hold住咗比賽嘅精彩程度，就係唔比高潮消退。

2025 F1倒數第三站拉斯維加斯街道賽，麥拿倫雙車起步出問題，甚至長時間被小紅牛暴力壓制。表現亮眼勢頭強勁嘅紅牛車隊韋斯特賓（VER），第一彎就搶得頭車直到衝線。但分差巨大，結局越來越清晰。如果唔系出咗個「大逆轉」仲裁，我哋會認為最後兩站已經系「垃圾時間」。

麥拿倫車隊，賽後被取消拉斯維加斯站成績！原因系底板過度磨損違規，底盤過低持續獲得空力優勢。FIA規定底板厚度剩餘不得低於9mm，而根據文件數據，實測4號車為前8.88後8.93，81號車前8.96後8.74（其實好好奇其他車隊底板剩餘量）。本來2、4名完賽，尤其最有望首次奪得WDC嘅積分榜首4號仔羅禮士（NOR）大幅度損失積分優勢。

最後兩站卡塔爾以及阿布扎比，重回低海拔永久性制式賽道，需要較高下壓力，超車難度適中。一直受賽車操控特性困擾嘅PIA是否能夠系此類賽道找回手感呢？不過地處沙漠地區，夜賽風向不定，賽道演進效果明顯，亦都可以利用其中不確定因素去爭端賽道位置。

雖然NOR目前依舊積分390分領先，不過僅領先並列第二名嘅隊友皮亞斯特利（PIA）366分以及追到同分嘅VER 24分。最後兩站其中卡塔爾有衝刺賽，最多仲有58分可以爭奪，2025 WDC局勢重回三人爭冠。

今年紅牛車隊唔掂嘅時候，VER各種神奇逆轉，被車迷稱作汽車人韋斯特賓。作為捧著車隊全速奔跑的人，目前系巴西站已經冒險違規啟用咗額外嘅全新引擎，動力強勁，加上後追嘅巨大心裡優勢，所以VER爭奪WDC呼聲持續高漲。

圖片均來自車隊官方，觀點僅代表作者個人；如果冒犯倍感抱歉，請立刻聯繫我們。

眼睇2025賽季得翻最後三站，關於WDC的爭奪勝利的天平似乎再次轉動傾向了麥拿倫車隊嘅4號仔羅禮士（NOR）。NOR最近几站比賽不但強，而且穩定得可怕，就好似剛結束嘅墨西哥以及巴西大獎賽咁，連續大滿貫。正如當年平治連冠時期嘅咸美頓（HAM）進入Hamitime咁，英國仔Lando Norris進入咗一個無解的ChampionZoom。

紅燈熄滅，比賽開始！先簡單報一報巴西站嘅情況：

PIA衝刺賽又再自己跣胎上墻，身後仲有兩台車同時喺同一彎上墻，事後調查係路肩藏水帶出咗路面；

全村嘅希望韋斯特賓（VER）帶領車隊破天荒雙車止步Q1，屬於紅牛建隊第一次；

嘟嘟嘟嘟BGM嚮起，VER違規Set車換埋新引擎，正賽維修區起步追到P3，VER本人認為爭WDC已成笑話；

PIA正賽借安全車重啟強插平治車隊安東尼利（ANT）導致連環事故（高清圖↓），罰10s唔冤枉；

平治車隊的未來小將ANT，被PIA強插到車尾起飛，撞爆LEC前胎之後奇跡無損落地，P2衝線獲生涯最佳；

全村嘅失望法拉利又雙車DNF！陸克萊（LEC）無辜卷入上文中PIA引發的連鎖事故，HAM則底板損壞；

NOR大滿貫攞滿分，積分優勢擴大到25分，最終完賽成績僅拉開10s，睇來車並無優勢，靠嘅係車手能力。

不過最神奇嘅係，大部分車迷觀眾並不關心NOR點解咁強勁，討論熱度反而係隊友皮亞斯特利（PIA）點解失速，點解成績下滑，甚至排位賽穩定咁慢過隊友0.3-0.6s，仲甚至打唔贏平治、法拉利。

PIA是否受到車隊區別對待？賽車是否採用不一樣嘅調教？車隊策略是否更加傾向NOR？當然，PIA喺墨西哥站後已經自己出來澄清：車，係一樣嘅車，車隊並無迫害，只係自己無法適應低抓地力賽道特性導致成績下滑。不過！依然有資深車迷唔死心，深挖羅列麥拿倫近幾站升級背後的數據，我哋簡單過一過原理。

眾所周知，F1同車隊有兩支唔同嘅車組，分別服務於兩部賽車。所以，車，係一定唔一樣嘅！至少根據車手習慣調教參數會唔一樣。有一種講法，係PIA拒絕咗加拿大站嘅前懸掛升級，因為距認為並無提升，但NOR則有採用升級前懸。而咧套升級前懸掛，正正係對應低下壓力以及輪胎打滑情況下嘅操控優化方案，而並不是速度提升。

據傳PIA駕駛風格唔中意打滑，喺四輪抓地嘅情況下能力出眾。而NOR陪伴車隊更長時間，喺麥拿倫混跡中游車隊時期，就非常習慣賽車抓地力不足而需要車手自己執生嘅情況。所以去到比較邋遢嘅賽道，例如街道賽；以及低下壓力賽道，例如高原賽道墨西哥同埋巴西，NOR都好快可以搵到合適嘅Setting去壓榨麥拿倫賽車嘅全部速度。

其實再穩翻下NOR對比PIA嘅往年數據，就會知道PIA確實係美國、墨西哥同埋巴西，都係慢過NOR唔少。譬如2024 Q3美國站PIA慢0.6s今年只係慢0.3；至於2024墨西哥站就更差了，PIA連Q3都入唔到，所以PIA嘅往年環比成績係提升咗！PIA喺採訪度認為自己需要改變駕駛方式，需要更多進步，其實係真嘎！事實近兩個賽季PIA都一直都有甘樣做。

至於車隊成員會唔會使小動作跣翻PIA几嘢咧？喂，大佬！現在F1係美國自由媒體集團掌舵嘎，而且車隊市值升到bangbang聲，搞d咁小動作就真係「作死」。利益角度上完全無必要，至少管理層絕對會公平對待。

但係話曬麥拿倫車隊總部喺英國沃金，英國籍車隊員工占大多數，或者個別有情結，希望自己家鄉嘅車手NOR攞WDC，但筆者認為影響有限。畢竟10支F1車隊，7支總部都係英國，如果家鄉情結影響咁大，英國車手早應該就壟斷比賽了。

圖片均來自車隊官方，觀點僅代表作者個人；如果冒犯倍感抱歉，請立刻聯繫我們。