分類: 人車生活

NSX翻生喔！不過唔係出新車

由 JAS Motorsport 聯同 Pininfarina 合作打造嘅 NSX restomod 新作 Tensei 已經正式定型準備投產，消息一出，唔少 JDM 同 NSX 車迷都相當關注。呢部車名 Tensei 取自日文，意思就係「重生」，不過要留意，呢個計劃並非本田官方項目，屬於獨立改裝團隊對經典超跑嘅重新演繹。

每一部 Tensei 都會以一部初代 NSX 作為基礎車，JAS 會將整台車完全拆解，再套上由 Pininfarina 操刀設計嘅全套碳纖維車身，全球只會製造 35 台。雖然本田並無直接參與開發，但 JAS 過往長期同本田有賽車領域合作，對於 NSX 嘅底盤底子可以講相當熟悉。

動力部份仍然保留原廠 C30A 嘅本體缸體，但內部全部交由英國賽車引擎專家 Judd Power 重新改造。Judd 重新設計咗曲軸，換上輕合金氣缸蓋同鈦合金氣門，更加大膽取消本田經典嘅 VTEC 可變氣門正時，改用賽車取向嘅固定凸輪設定，排氣量亦提升至 3.5 公升。呢副自然吸氣 V6 最大馬力 414 匹，於 8300 轉輸出，最大扭力 413 n·m，紅線轉速高達 8500 轉。帳目數據上雖然唔及現代大量渦輪超跑，但高轉自吸嘅特性好有味道。動力會經六速手動波箱、碳纖維雙碟離合器同 Torsen 限滑差速器，只推動後輪，全程唔提供自動波選項。

車身方面 Pininfarina 將原本鋁製外殼全部替換成高模數碳纖維部件，加入初代 NSX 從未有嘅平底底板同主動式後擴散器，跳燈結構就得以保留，但升級做矩陣 LED 燈組。車體乾重為 1250kg。制動採用 Brembo 剎車套件，前六活塞、後四活塞卡鉗；底盤配備 KW 帶動態阻尼控制嘅電子可調避震，車主可以自行調校懸掛表現，較原廠 NSX 有更大調整空間。JAS 方面表示，Tensei 嘅開發目標，係令呢部老派超跑可以適應現今超跑市場，同時唔丟低令初代 NSX 成為傳奇嘅種種特質，呢個理念貫穿每一個部件嘅改動之上。

售價方面，Tensei 起價 88 萬歐元，呢個金額仲未計基礎捐獻車、稅款同客戶嘅個性化訂製，定位屬於高級訂製改裝作品，並非普通改裝車。新車將會喺 2026 巴黎車展作公開首發，暫時未公佈經銷商網絡。由於每一台都需要客戶提供 NSX 作為基礎車，生產進度會受可取得嘅初代 NSX 車況影響。

另外，除咗 Tensei 之外，近年市面上都陸續出現不少主打手動波嘅經典跑車 restomod 專案，大家都嘗試喺現代技術同舊車血統之間求取平衡。對於好多 NSX 忠實支持者最為緊要嘅係，呢部 Tensei 究竟可以保留幾多原作嘅駕駛靈魂。

圖片均來自網絡，觀點僅代表作者個人；如果冒犯倍感抱歉，請立刻聯繫我們。

2026年10月15日

吹毛求疵？歐7排放標準之隱藏關卡

INTRO

天氣剛有轉涼之意，早前酷熱的氣溫令到各位大汗淋漓之餘，加上太陽熱輻射的烘烤，臉上同頸部的油脂分泌亦較秋冬季節有著更加旺盛的分泌，在此都要提升各位注意防曬護膚。當然啦，此處並非護膚頻道，所以筆者其實係想大家留意同回憶一下，夏日拿起手中條毛巾或者Tempo抹臉的時候，是否有發現到連同汗液同油脂一同帶走的，還有那層「灰色的軌跡」？

其實呢層深色污物，除了一般環境塵埃之餘，有相當部分係屬交通運輸中，來自車輛引擎排放、輪胎磨耗以及煞車碟/片摩擦產生的細微粉塵。如果大家去開葵涌貨櫃碼頭（現為葵青貨櫃碼頭），又或者油尖旺區車多路窄的區域，現象就尤為明顯。

大家都知道，香港本土並無汽車生產工業，所有車輛都係靠進口，相關法例亦都係根據「來佬」基準而制定。而隨著科技同環保要求的進步，尤其係歐6及其他地區的相應標準實施，以及路面車輛新舊更替，近十年已經該類型的污染已經逐步減弱。最新歐7標準即將於本年度（2026）第四季度實施，根據其發佈的標準路徑（roadmap）發展信息，本次較歐6的進一步收緊的程度可以用「嚴苛」來形容，促使汽車品牌和零件供應商要對產品技術進行大換代。

那麼，最新的歐7排放標準，到底會為本港的空氣和環境潔淨程度，帶來何種裨益，以下就由筆者帶大家拆解。

RULES ARE RULES

無規矩不成方圓，有Bar先有Standard。

不少喜歡涉獵汽車文化的「鍵盤客」一聽到「排放標準」，都好似會本能地「抗拒到過敏」，彷彿已經見到屏幕背面義憤填膺的面孔，振臂高呼「標準毀了汽車、滅了性能」。

條bar的確set咗響度，難度同變改肯定係隨之而來，但若pass得到，另外一面的「世界」究竟係點，大家又有冇切實地去構想過呢？

口講無憑，我們馬上展開看看歐6 與歐7 核心異同對比，再行分析：

對比維度	歐6 (Euro 6)	歐7 (Euro 7)	核心變化解讀
管控範圍	僅尾氣排放	尾氣 + 制動/輪胎 + 電池耐久性	從「排氣管」擴展至「車輛全生命周期」，電動車也被納入監管。
限值標準	汽油/柴油限值不同	所有燃料類型統一限值	消除燃料歧視，汽油車與柴油車適用相同最嚴標準。
顆粒物監測	PN > 23nm	PN > 10nm	監測精度提升，能捕捉更細微的有害顆粒。
耐久性要求	5年 / 10萬公里	10年 / 20萬公里	車輛需保持清潔的時間翻倍，對後處理系統可靠性要求極高。
監測邏輯	實驗室 + RDE路測	RDE + OBM車載實時監測	從「認證通過」轉變為「全生命週期持續監控」，杜絕作弊與老化超標。
測試條件	常規RDE工況	擴展至45°C高溫、高海拔、短途	覆蓋更極端的真實用車場景，確保極端環境下排放達標。
輪胎/制動粉塵	無任何限制	首次強制設限	填補非尾氣排放監管空白，電動車與燃油車同等受控。

細心的讀者迅速就可發現，除了更進一步的圍棋排放限值，此次歐7史無前例地增加了3項全新限制：

「全生命週期持續監控」以往僅規定車輛上市前需通過標準，現在變成「需通過並保持」到全生命週期
首次設限「輪胎排放標準」
首次設限制「動粉塵排放標準」

其中，「1」對於傳統燃油引擎車型成熟的生產和保養體系，過渡到最新標準難度不大；新增的此項限制，筆者認為更多是針對使用大型電池組的電能車/混能車而誕生，前瞻性地避免爆發式增長的電車（電池組）在不久的將來留下巨大的「爛攤子」，而另一方面則是保障消費者的相關投入，起碼在一定週期內，不會「掉落鹹水海」。

*此處相關面甚多，亦和電能車選購直接相關，暫且不作展開，筆者後續將會另開一篇專門說明，敬請留意。

而「2」和「3」 – 即「輪胎/制動粉塵」的新增監管維度，實屬歐7最具革命性的變革，是為對之前監管「真空地帶」的首次填補。隨著歐7對尾氣排放被極致壓縮，非尾氣顆粒物已成為城市空氣污染的主要來源（佔比可達5%-30%）：輪胎作為全天候與路面接觸的磨耗部件，在使用過程中產生的有害顆粒物排放量相比尾氣甚至高出1000倍，數據顯示，目前歐洲每年就有最少50萬公噸輪胎磨耗顆粒（司機大佬們口中的胎屎）排放到環境當中；而制動粉塵則占據非尾氣排放微粒及超微粒（即大家耳熟能詳的PM10及PM2.5）的「大頭」，前者可達55%，後者則去到20%！

歐7之前，制動過程中產生的粉塵，除了較高鐵含量的顆粒，還有來自碳素 – 石墨和各種金屬，如銅、硅、鋇、鋯、銻等微粒；其中，鐵和銅已被醫學研究證明，對大腦和心臟細胞有顯著危害。

在此不是渲染恐懼，而是將簡單的數字和科學展現給各位，動動手指就可以計算到，我們熱愛且依賴的汽車，雖尾氣排放的污染已經有效控制，但依然有許多會對人類長久健康產生負面影響的物質，亟待治理。

SOLUTION

問題天天都多，所幸解決方法亦不在少數。

輪胎產業

其膠料配方、胎面花紋設計開發，必須將「低磨損」作為與滾阻、抓地力同等權重的核心指標。業內巨頭亦先後投入鉅資研發「低排放輪胎」，以及顆粒物收集/計量技術進行監測。

根據歐7標準路徑，輪胎分級為C1/C2/C3三個級別，其中C1級主要應用於輕載荷的私家車，2028年7月1日開始對上市輪胎進行認證，2030年7月1日起，所有新上市的C1級輪胎均需符合該標準，過渡期為2年；屆時，現有的市售輪胎，接近50%的型號將不符合歐7新規，無法繼續銷售。

*C2/C3級別對應時間截點則分別為2030年4月1日 – 2032年4月1日、2032年4月1日 – 2034年4月1日；而亞歐大陸另一邊，素來和歐洲「對標」中國「國七」標準，亦會以相似的標準和時間框架，對輪胎行業實施最新標準。

而其中的尖子生叫米仔（Michelin），在2005年（你沒有看錯，就是21年前）就開始了相關研究和產品改進，到2025年，由德國ADAC發佈、涵蓋160款輪胎型號的研究表示，米仔輪胎的顆粒物排放量平均比其他四家業內巨頭的產品低26%，同時，操控和靜音性能並沒有因此下降，耐用度甚至有顯著性提升，可謂碾壓式優勢。

在此基礎上，Michelin將成為最早於2028對旗下輪胎產品進行「合規」的品牌，因為其領先性，更成為了最新標準的試驗參考基準輪胎（Standard Reference Test Tyres）。姜，還是老的辣。

制動產業

由於之前規例對制動粉塵的限制甚少，如今歐7實施，行業要去應對則需要大刀闊斧程度的改進和創新。目前主要路徑有二：

A. 制動卡鉗的Zero-Drag（0拖煞）減磨技術，旨在消除傳統制動系統非工作時段，煞車皮與煞車碟未能完全脫離接觸時，產生的持續摩擦阻力。

其中有Brembo Energy Saving System為首的、以彈性簧片將煞車片分離開、用最少的改動實現效果的簡易方式；還有以Continental MK C2、BOSCH EMB等Brake-By-Wire科技，對制動系統進行重構的未來方向。

B. 對摩擦材質進行升級。制動粉塵來源於煞車碟與煞車片共同產生的微粒，要減少其排放，歸根究底在於提升煞車碟硬度的同時匹配粉塵更少的煞車皮。後者相對容易，但前者則需要廠家們各出奇謀、發揮下小宇宙啦。

有Fraunhofer IWU直接將傳統灰鑄鐵材質更換成不鏽鋼材質，亦有Nitrex開發Smart ONC®表面滲氮技術提升硬度，Porsche PSCB/BOSCH iDisc則制出高成本碳化鎢塗層方案，美國Pureforge更是創造出基於PVD（氣相沉積）技術的金屬晶格化技術，提升硬度的同時竟然還能吸引制動微粒！當然還有Otto Zimmermann這種「隱藏大佬」，不滿足採用單一方案，應用近似3D打印的激光金屬沉積（LMD）、冷氣動力噴塗塗層（CSC）、鐵素體碳氮共滲（FNC）等等先進工藝輪番上陣。高科技一時間的大量湧入令人“0嘴”，全為減低排放，不知道還以為是要製作某種高性能引擎或富豪定製手機，實在歎為觀止，又十分期待。

甚至還有Mann+Hummel這種為制動系統「戴口罩」的特殊手段，作為過渡期方案，甚至可為歐7之前車輛進一步減排，也是前所未見。

在制動系統、材質和製造工藝的全面升級之下，除了環保，車輛制動效能和穩定性，更是「順帶」被提升了一個Level，作為一個用車市民自然是喜聞樂見。

歐7制動粉塵排放標準將於2026的11月29日開始實施，相信會成為大家最快體驗到的歐7「升級」，優點多多，缺點是此種級別的提升帶來的成本上揚亦會很快浮現，屆時消費者又要付出多少，拭目以待。

Conclusion

喜好無絕對，千人有千面，依家唔係要問錯對，但筆者懇請大家思考下：一方面，新的Standard是否真的給到你「質地不好」的產品，還只是「過渡期」帶來的思維慣性不適，相信大家各有定奪；二來，環境污染帶來的健康問題，卻是無法忽視的切實影響，即使不去為後世著想，也要為老來的自己打算。

*圖片及部分數據來源於網絡，觀點僅代表作者個人；如果冒犯倍感抱歉，請立刻聯繫我們。

2026年10月8日

Audi A2正式復活，超前失敗到電動時代重新出發
有時車廠有好多極具遠見嘅構思，其實都係生不逢時。例如當年嘅 Audi A2，好多車友都會記得呢部 90 年代末嘅神級小車。當年 Audi 廠商大膽採用 ASF 全鋁車體，做到輕量、低風阻同極佳油耗，成個放到今日都仍然好先進。奈何當年市場未準備好，高昂造價令銷情慘淡，最後黯然落場。

不過，時隔二十幾年，Audi 正式將 A2 呢個經典車名復活，新車定名A2 e‑tron，搖身一變成為緊湊型電動 Crossover，將初代 A2 講求高效、實用嘅核心精神，搬入電動新世代，今次終於踩中市場嘅時間點。新車外觀保留初代 A2 嘅靈魂，方正高身車體、車尾嘅分體式雙層玻璃尾窗，都係向舊作致敬。不過就唔再係細部嘅hatch，車身變得更闊，輪拱更飽滿，整體係四平八穩嘅 Crossover 姿態。雖然繼承復古元素，但全套係 Audi 最新電動車設計語言、幼細燈組同空力輪圈。

呢部車最大賣點，就係空氣動力同能耗表現。廠方話 A2 e‑tron 係品牌有史以來效率最高嘅量產車，風阻係數低至 0.24Cd，比當年嘅鋁製 A2 再進一步。為咗壓低風阻，底盤做全封閉處理、有可調節主動散熱進氣口、輪拱周邊加入導流部件，連門把手都用上感應式翼型電動把手，輕輕一拉就會電動彈開，當然設有後備電源，唔怕電子系統失靈開唔到門。

WLTP 測試底下，大電池版本每百公里能耗低至 12.8kWh，三組電池規格分別係 52kWh、61kWh 同 84kWh，對應唔同使用場景。
- 52kWh 入門版：單後驅馬力 168PS，0‑100km/h 8.8 秒，WLTP 續航 422km，英國開售價由 32200 英鎊起
- 61kWh 版本：馬力 190PS，加速 7.9 秒，續航 515km
- 84kWh 大電池版本：最高可選 326PS 旗艦設定，0‑100km/h 只需 5.7 秒，WLTP 最大續航 645km，極速可以去到 200km/h，其餘版本就會被限制喺 160km/h。
值得留意，新車基於 MEB 平台開發，全系後驅，唔提供 Quattro 四驅版本。快充方面，84kWh 大電池最高支援 183kW 直流快充，由 10% 充到 80% 需要 29 分鐘；細電池版本快充功率得 100kW，但因為電池容量細，充電時間反而縮短到 24 分鐘。同其他 VW 集團 MEB 電車一樣，支援雙向充電功能，可以反輸電俾家用電器。

入到車廂，就見到 Audi 全新座艙佈局，11.9 吋儀表屏幕加上 12.8 吋曲面中控觸控屏，撥波桿移到轉向柱側面，釋放咗中控台大量空間。中控台設有 Qi 2.2 雙位無線冷卻充電板，可以同時俾兩部手機充電。

最特別就係首次喺量產車登場嘅Fidlock 磁扣模組系統，透過磁石加機械鎖扣，杯架、雜物袋等配件可以直接扣喺車廂同尾廂嘅指定位置，彎道急駛都唔會周圍碌，靈活度相當高，日後呢套技術都有機會下放至其他 Audi 車型。實用性方面，軸距同 Q4 e‑tron 一樣係 2770mm，前後座腿部空間有保證。不過尾廂得 396 公升，比自家 Q4 e‑tron 嘅 520 公升細，輸俾 Renault Megane E‑Tech 嘅 440 公升，但就略勝 VW ID.3 同 Volvo EX30。另外仲設有前備廂 Frunk，增加擺放充電線嘅空間。

同初代 A2 不惜工本全鋁車身唔同，今次 A2 e‑tron 主要用鋼材，局部加入鋁合金部件，控制造車成本。好有趣嘅係，由草圖到正式亮相，成個開發週期只係 21 個月，速度相當驚人。不過要留意，新車暫時主攻歐洲市場，美國市場就唔會導入，香港會唔會引入目前亦都未有消息。回顧歷史，初代 A2 理念完全行得太前，先進技術換來高昂售價，當年消費者唔願意買單。而家歐洲電動車市場成熟，消費者重視能耗同空間靈活性，A2 e‑tron 終於等到屬於自己嘅時代。

不過目前網上都出現唔少爭議聲音：有車友覺得新車失去舊 A2 獨特嘅簡約氣質，內裝質感似 VW 多過 Audi；亦都有人覺得入門版馬力一般，售價唔算平。但無可否認，佢繼承咗舊 A2嘅核心，將低能耗、高實用性擺喺第一位。究竟呢部遲咗四分之一個世紀先出現嘅繼承者，可唔可以扭轉初代 A2 嘅命運，就要睇歐洲市場嘅反應。同時，筆者就好希望呢款車可以進入到香港市場了。

圖片均來自網絡，觀點僅代表作者個人；如果冒犯倍感抱歉，請立刻聯繫我們。
2026年9月24日
命運巧合定系有意為之？似乎已經唔重要

Ferrari F40無論係車壇歷史地位，抑或收藏市場嘅身價，都係殿堂級經典。作為 Enzo Ferrari 親自落手嘅最後一部作品，呢部慶祝品牌 40 週年嘅超跑，一直都係無數車迷嘅夢幻座駕，就連七屆 F1 世界冠軍 Lewis Hamilton，都對呢部車心心念念好多年。來到 2026 意大利大獎賽蒙扎站嘅媒體日，Hamilton 就親自揸住佢新入手嘅 F40 現身賽道圍場，成為當日最大話題。呢部車唔係普通二手 F40，背後嘅故事同埋一個極之奇妙嘅巧合，令全球車迷都嘖嘖稱奇。

Hamilton 表示，自己尋找合適嘅 F40 已經一段時間，揀車有兩大條件：低咪數，同埋要有獨特故事。其實市面上拍賣會流出嘅 F40 數目唔少，但好多都係已經翻新過，要麼只係咪數低但毫無故事性，唔係佢想要嘅目標。而佢最終搵到嘅呢一部，原車主當年由 Maranello 開返屋企，只行咗 69 公里，之後就直接泊入車庫，套上防塵罩一放就係三十幾年，連乘客門從來都未打開過，長年被灰塵覆蓋。到手之後 Hamilton 都面對一個兩難：係就咁擺住當藝術展品，維持原始狀態；定係交由原廠完整復修，令佢重新落場行走。思前想後，佢選擇送去 Ferrari 工廠做原廠復修，最大原因，係佢想真正揸呢部車，唔係只擺佈做擺設。

另外一個諗法都促使佢下決定：「歷史上 Ferrari 嘅 F1 車手，好似從未揸住自己手上最經典嘅名車，現身比賽周末。好似 250 GTO、F40 呢啲級數嘅作品，我覺得呢件事一定要做到。」Ferrari 工廠技師用咗好幾個星期時間拆解檢查，估唔到呢部封存三十載嘅車狀態相當理想，大部分部件仍然運作正常，需要更換嘅零件寥寥可數。但當技師將 V8 引擎拆卸出嚟嘅時候，出現一個近乎命運般嘅驚喜：引擎本體上面，竟然刻住編號44，正正就係 Hamilton 嘅賽車號碼。

不過筆者認為，作為一台限量版車型，Ferrari廠商本身自然都會有詳細登記記錄，相信以廠商角色，要穩到台車沒太大難度。你可以講係為咗週末賽事嘅宣傳造勢，不過似乎已經唔重要。

引擎上的44字樣，不過這個似乎有少許「過分巧合」

Hamilton 接受訪問時都話自己完全唔敢相信，仲質問技師係咪講大話。呢個 44 號源於佢早年參加卡丁車年代，父親座駕嘅車牌號碼，一路跟隨佢去到 F1 賽場，而今日竟然喺一部三十幾年前嘅 Ferrari 引擎上面遇上，佢形容呢件事完全係命運嘅安排。回顧過去，Hamilton 一年前曾經公佈賣走自己幾乎全部私人車收藏，當中包括 McLaren F1、Pagani Zonda 760 LH、LaFerrari 等等傳奇跑車，當時佢講自己而家更加鍾情藝術品，如果會再買車，就只會係 F40。細個嘅時候，佢已經將 F40 視為心中紅色神車。當年佢同老竇參加卡丁比賽，只可以租 Fiat Cinquecento 出入賽場，未來嘅隊友 Nico Rosberg 就已經坐住黃色 Lamborghini Diablo 到場。時光飛逝，今日自己可以揸住呢部傳奇 Ferrari 現身蒙扎，對佢個人而言意義非凡。

其實早喺 2025 年 1 月，Hamilton 剛剛加入 Ferrari 嘅第一日，就已經喺 Fiorano 賽場 Enzo Ferrari 故居外，同廠方嘅 F40 合照。而今次蒙扎，就用屬於自己嘅 F40，重演當日嘅畫面。一身黑西裝配埋貝雷帽同大衣，專門設計嘅造型，就係向整個賽車運動致敬。講返 F40 本身嘅硬實力，2.9L 雙 Turbo V8 引擎，輸出 471 匹馬力，配 5 速手波、後驅設定，乾重大約 1100kg，當年號稱第一部突破 320km/h 嘅量產跑車，1987‑1992 年總共生產 1311 部。目前收藏市場入面，狀態完好、低咪數嘅 F40 身價持續走高，早前 Monterey 拍賣會上面，一部僅行 72 英里嘅 1991 年 F40，成交價高達 836.5 萬美元；近年成交中位數都接近 320 萬美元，完美原始車更加輕易突破 500 至 800 萬美元。Hamilton 就冇公佈自己呢部神車嘅入手價錢。除咗擁有呢部原版 F40 之外，Hamilton 仲有另一個計畫，希望以 F40 作基礎，親自參與設計一部名為 F44 嘅新作，仲要堅持手動波箱設定，外界都好期待呢個專案日後會有咩進展。

只可惜，同週末有WEC賽場上面的499P表現甚好，根據Ferrari嘅守恆定律，Ferrari F1車隊的表現確實不是很好看。不過，好在本次奪冠的車手Antonelli系意大利人，總算拿翻個主場冠軍。

圖片均來自網絡，觀點僅代表作者個人；如果冒犯倍感抱歉，請立刻聯繫我們。

2026年9月11日
MR2返嚟啦，豐田車迷似乎可以如願
講到 90 年代 JDM，MR2 絕對係好多香港車迷嘅集體回憶。由 AW11 跳燈版本，再到被戲稱「平民法拉利」嘅 SW20，以至末代 MR‑S，呢部日系中置跑車，曾經令好多人體驗到中置機器嘅彎道魔力。自從第三代 MR‑S 停產之後，呢個車名就長期僅僅活於改裝聚會、舊車市集同埋各路傳聞入面，復產傳聞已經浮現多年。

相信不少車迷對MR2復產嘅傳聞其實都已經打曬預防針，畢竟真係次次都講，次次都無料到。不過，今次豐田真係認真嘅。

隨住近年 GR 部門大力擴充性能陣容，各種GR性能車型似乎有可能，因此關於 MR2 重出江湖嘅消息再次不斷傳出。最近更爆出偽裝原型車都喺富士賽道跑出，再加上日媒 Best Car Web 同多個海外汽車媒體爆料，睇落今次唔係得個講字，Toyota 真係認真緊開發新一代 MR2。

明顯豐田方面唔希望大家太容易想像到台車生乜樣，尾燈明顯係直接拿咗GR Yaris嘅上車使用。

根據現場拍到嘅測試車相，呢部並非只為測試機器嘅偽裝車，已經擁有接近量產版嘅車身比例。最明顯特徵就係駕駛艙明顯前移，座椅後方設有大面積進氣口，闊得誇張嘅後輪拱，種種細節都話到俾大家知，新車堅守 MR2 靈魂 ——中置引擎佈局。

中置佈局嘅好處唔使多講，前後配重可以做得更加平衡，轉向慣性細，彎入彎出反應會靈活好多，呢個都係舊 MR2 當年最令人着迷嘅地方。不過同舊款純後驅設定有分別，傳聞頂級版本會導入 GR‑FOUR 可調式 AWD 四驅系統，將 GR Yaris、GR Corolla 嗰套四驅技術移植過來，令大馬力版本起步同彎道穩定性再上一層樓，中置四驅真係幾吸引。

動力心臟傳聞會用上全新 G20E 2.0L Turbo 四缸渦輪機器。消息指普通版本輸出大約 400‑450PS，頂峰版本馬力有機會衝破 600PS。呢副引擎仲預留咗 Hybrid 同 PHEV 插電混合嘅升級潛力，日後可以透過混能方案應付各地排放法規，同時繼續推高性能上限。

按照豐田規劃，新款直列4缸引擎G20E就會應用係MR2上面。

目前流傳MR2車身尺寸大約長 4400mm、闊 1860mm、高 1230mm，比起舊 Celica 更加矮同闊。外觀上會參考 2023 FT‑Se 概念車嘅設計語彙，低趴寬體，線條充滿戰鬥感，尾箱維持雙艙蓋設計，分開引擎同行李廂。為咗控制開發成本，亦有機會挪用 GR Yaris 燈組、Lexus LC 車門等現有部件。內裝方面，唔會一味堆砌大螢幕同花巧電子裝置。傳聞保留 2+2 座椅佈局，儀錶同中控設計參考 GR Yaris、GR Corolla 嘅風格，整個座艙以駕駛者作為中心，保留方向盤嘅路感同機械感，唔想整到一部淨係識快，但冇駕駛味道嘅機器。

上圖為豐田 FT-Se 電動概念車，此前就被認為是「MR2或者是MRS」嘅一個預覽。

商標方面，其實 TOYOTA 已經動做好曬鋪墊，例如係美國註冊 MR2 商標，日本申請 GR MR、澳洲提交 GR MR‑S 商標，外界估計新車好大機會直接歸入 GR 獨立品牌底下，唔再打 Toyota 廠徽，類似 BMW M 咁樣嘅運作模式。

不過要講明嘅係，以上全部都係媒體同業界消息，TOYOTA官方未正式確認新車名稱、規格同埋發布時間。坊間流出預計2027 年亮相，而日媒就預計最快 2028 年先正式登場。而家 GR 陣營入面，GR86 負責入門後驅樂趣，GR Supra 偏向 GT 巡航取向，如果 GR MR2 真係順利推出，就會填補中置操控跑車呢個空缺，令成個 GR 跑車陣容變得完整。而家好多新跑車愈出愈重，愈來愈依賴電子系統去執行彎道工作，仲願意堅持燃燒引擎、追求機械駕駛感嘅新車，其實愈來愈少。MR2 嘅回歸，唔只係一個經典車名復活，亦都代表一班工程師想再做一部俾人玩嘅跑車。

只不過現時全部只係傳聞，作為 JDM 車友，我哋都只可以繼續睇住測試消息，睇下呢部傳奇中置跑車最後會變成點樣。
```
圖片均來自網絡，觀點僅代表作者個人；如果冒犯倍感抱歉，請立刻聯繫我們。
```
2026年8月31日
HONDA有無機會復產S2000？可能真係自作多情囉！

Honda粉好興奮，全因加州車展出咗部 Acura Nexera Vision 概念車，於是就有啲海外媒體即刻畫埋假想圖，將呢部概念車改造成新一代 S2000 嘅造型，講到好似聽日就會落order量產一樣。難聽講句，真正復產 S2000短期內完全冇望，真係好難有實車出街。

首先，Nexera Vision 本身唔會量產，所以完全没必要睇到概念車就流曬口水，以為Honda有全新後驅跑車底盤可以俾 S2000 用？唔好自作多情喇。Nexera Vision 只係一部設計展示概念車，主要都係為咗展覽設計概念，講白就係一部靜態展車。廠方真正想落實嘅，只係新車頭尾燈造型，未來會先用喺新款 RDX Hybrid 呢部家用 SUV 身上。至於海外媒體展示嘅紅色新 S2000 渲染圖，就係編輯嘅假想設計圖。

此圖為Thanos Pappas 為 CarScoops所繪製

此圖為Thanos Pappas 為 CarScoops所繪製

此圖為Thanos Pappas 為 CarScoops所繪製

以上就係海外媒體近期展示嘅S2000假想設計圖。其實初代 S2000 之所以成為神車，全靠佢專屬前中置後驅底盤、50:50 前後配重、輕量化車身。儘管生產嘅時間長達十年，但係1999 到 2009 年先出產 11 萬部左右，小型生產線同專屬底盤研發成本相當高，好難分攤成本。而家Honda目前嘅全球主力平台都係橫置前驅，淨係得新 Prelude 有所謂嘅後驅混動架構，同S2000嘅專用後驅底盤根本兩回事。甚至公司內部都承認，大家都鍾意 S2000，好想再造一台，但而家完全冇合適底盤可用。

目前日本公司流行嘅同其他廠商合作，例如豐田 GR86 同掃把佬BRZ、Supra聯合寶馬Z4，聯合開發降低成本。但似乎Honda又係好願意，唔想同其他品牌共用底盤，單獨起一條全新後驅小跑平台，又要燒幾十億研發費，加上最近Honda全球範圍內已經出現虧損，商業角度完全唔成立。

而家本田性能車線已經有兩條主力：Civic Type R 熱掀背、全新 Prelude 混動雙門跑車，兩部車已經覆蓋曬大部份鍾意本田駕駛樂趣嘅客戶。兩座開篷小跑屬於極小眾市場，全球一年最多賣幾千部，相對 SUV、家用房車嘅走量，利潤低到可憐。本田而家優先投資電動車產線、0 Series 純電系列，資源完全唔會分出來研發一部難賺錢嘅復古小跑，管理層唔會批呢個項目上馬。

所以其實大部分香港車迷都比較現實，目前真係想玩 S2000 只可以搵下有無靚仔，唔好再等新車。儘管目前好狀態嘅 AP1、AP2 放盤價格一路升，CR等版本更加稀有保值，正正因為大家都知唔會有後繼車。與其每日追渲染圖自欺欺人，不如接受現實：本田內部縱使工程師、設計師個個都鍾意 S2000，但成本、平台、電動化戰略三大關卡擺死，復產呢件事，只會永遠留係網上嘅想像圖入面，唔會變成真實量產車。

圖片均來自網絡，觀點僅代表作者個人；如果冒犯倍感抱歉，請立刻聯繫我們。

2026年8月23日
唔存在「iM3」，依舊係「M3」！

寶馬方面係不久前嘅利曼24小時耐力賽展示咗M Concept Neue Klasse，可以講係提前預覽咗明年面世嘅電動M3，然而說到電動M3，不少人會稱之為iM3，但近日BMW證實電動M3車名了。

BMW不久前於利曼24小時耐力賽帶來M Concept Neue Klasse，儘管係概念車，但M Concept Neue Klasse和E30 M3同台亮相，其實係2027年登場嘅電動M3預覽。而講到電動M3，此前不少人稱之為iM3，針對此車名近日BMW表示，BMW M3不論四缸、六缸、V8還是純電，永遠都是「M3」，因此電動M3車名當然都係M3，從E30 M3幫M Concept Neue Klasse撐場，可以睇到BMW對於電動M3車名與性能都相當有信心。除了電動M3之外BMW方面同樣計劃推出i3 M60 xDrive，而對於內燃機忠實擁躉也無需擔憂，BMW計劃2028年會推出新一代燃油M3。

BMW日前於利曼24小時耐力賽帶來M Concept Neue Klasse，算係電動M3嘅一番預覽。

BMW近日表示M3無論缸數、燃油還是電動，永遠都會是M3。

M3 E30 M3來撐場，顯然BMW對於電動M3車名與性能非常有信心。

同時，係Good Wood期间，BMW M 部門 CEO Frank van Meel接受採訪確認：「這款電動 M3 不會被稱為“iM3”之類的名稱」「電動性能車領域中，目前四位數嘅馬力參數已經成為不少車企常規嘅營銷噱頭，但 BMW M 選擇不跟風」。實際上，目前電動車性能裡面，最容易被忽略嘅有幾個方面，電量衰減時保持穩定輸出功率、控制整車整備質量，以及讓這款最重嘅M3駕駛起身依舊輕盈爽利。因此，單純追求馬力數據並沒有太大嘅意義。如果有接觸過去全碳纖維車身BMW i3嘅車友，應該可以理解到BMW係整車平衡上有非常優秀嘅能力以及追求。

圖片均來自網絡，觀點僅代表作者個人；如果冒犯倍感抱歉，請立刻聯繫我們。

2026年7月30日
講真，MG終於出翻只似樣嘅車仔！
MG係前段時間嘅Goodwood速度嘉年華上面發佈咗兩款全新概念車，分別係純電掀背車型MG GO!以及主打高性能純電動嘅跨界車型MG Cyber Concept。兩款新作都表達咗MG對未來電動車產品嘅發展方向，筆者認為似乎MG希望將傳統嘅英國跑車歷史融入其中。其中筆者最尾感興趣嘅係MG GO!。

MG Go！嘅外觀上由英國方面 MG 設計中心團隊操刀，其外觀設計靈感源自 MG 係20 世紀中期推出的傳奇雙門車款 MG MGB GT。透過黑化的 A 柱，帶來類似懸浮式車頂效果，厚實的 C 柱搭配尾翼也成為視覺上的重心，車身尺碼則設定在相當緊湊嘅 4 米左右。

MG方面將會係2027年左右推出定位B-Segment級別嘅純電掀背車，因此MG GO!可以視為係新車嘅一個設計預覽。MG GO!車身外觀上，除咗採用純電車慣用嘅大型封閉式鬼面罩，車頭燈有雙直線嘅日行燈造型，燈組設計相當有特點。正面下方隱藏著「GO!」字樣造型。側面可以見到半隱藏式車門把、電子後視鏡，搭配下方的導流鰭孔造型。車尾上方有大型尾翼，垂直燈條、搭配圓潤尾燈外框，帶來頭尾呼應嘅視覺效果。目前外界推測未來 MG GO!概念車型量產後可能以 MG2 來命名，最快可能會在 2027 年量產，售價則約為 2 萬歐元左右，來挑戰 Renault 5 與 Volkswagen ID.Polo 等對手。

不過筆者認為，MG GO！同時擁有非常明顯MG6 R4 Group B拉力賽車嘅元素。

而且顯然MG Go！更有自家MG3嘅一些影子存在。

MG哩個品牌成立於1924年嘅英國牛津，品牌名MG係代表Morris Garages縮寫，MG係創立之初就以雙門跑車作為主要發展目標，陸續在1920年代推出14/28、MG Old Number One以及M-Type等經典車型，且都係平價車款，為MG立定了深植人心嘅運動形象。

1960年代，MG與Austin以及Jaguar等英國品牌陸續被併入BMC與BMH，後來BMH又改組Rover集團，而MG就改以MG Rover之名面向世界。不過，即使MG與眾多英倫品牌資源整合，依舊沒有順利走出頹勢，當然這其中有不少外在國際情勢的影響，但在1994年時MG又被出售給Rover集團出售俾BMW，因此當時已經係Rover旗下的Mini係此時被納入成為BMW集團中嘅一員。目前，MG已被中國汽車製造商上汽集團收購。MG以及Morris、Austin品牌目前都归属于中国的上汽集团。你估下有無可能MG GO！嘅量產車型回重啟Morris、Austin之名？今次估計Mini有排都訓唔著了！

一款貼著英國車標的中國製掀背車能否係全球市場取得成功呢？尚待驗證，不過，BMW當年重啟Mini品牌至今已過去25年，Mini品牌重啟無疑取得了巨大成功。筆者有理由相信，MG GO!後續量產車型很有可能成為Mini係英國市場嘅有力競爭對手。
```
圖片均來自網絡，觀點僅代表作者個人；如果冒犯倍感抱歉，請立刻聯繫我們。
```
2026年7月18日
掃把佬正式推出經典車計劃
隨住掃把佬Impreza車型嘅年歲增進，曾經都覺得頗為後生俗稱「789代」嘅GD世代都已經邁入咗二十年關卡。而GC世代更唔使講早已經進入「Classic Car」嘅行列。車年是已高加上原廠零部件陸續停產，對於唔少用戶或者玩家而言，繼續去持有一台Classic Car都係一個比較高難度同高投入嘅課題。此前筆者認識咗一個GC車型玩家，部分零部件嘅停產甚至令佢要去嘗試自己去進行復刻，特別係某類關鍵部位嘅橡膠件，密封件，塑料部件。

正好有個消息，掃把佬方面正在傾聽其最熱情嘅車主意見，並為 GC 世代嘅 WRX 和 STI 提供替換零件。實際上其他日本製造商如萬事得同日產，都有類似服務，而且最初只係日本提供傳統零件支持，但後來擴展到美國市場。按照掃把佬方面嘅規劃，暗示其他車型都會好快獲得相應支持，甚至包括早期的美國市場車型。

掃把佬目前嘅Heritage Service Program最初僅限於日本市場服務，主要針對基於GC底盤的WRX和STI車型。然而其他汽車公司提供的零件項目最初都係日本進行試點，理論上只有日本車主才能享受到這兩家公司提供的原廠修復服務，不過零件最終都開始在海外銷售。所以對於香港嘅GC車主，實際上唔存在太大購買難度，無非都係日本網站直接購買。

官網上面有相關配件列表，有興趣嘅車友不放上去睇睇有無心水零件

至於GD世代「蟲眼」「淚眼」「鷹眼」WRX和STi嘅車友都唔好灰心，有好消息：掃把佬好有可能會開始著手GD世代，實際上目前GD世代零件依舊在產，尚未完全停產，加入經典車計劃後，相信部分停產零件會得以復產。放眼全球，美國市場對掃把佬至關重要，而且新世代STI車型目前又處於停產狀態。因此掃把佬方面會有相關計畫正在醞釀之中，有可能為美規STI即將迎來25週年紀念之際，推出相關車型嘅經典車服務。

講翻目前日本方面嘅規劃先，掃把佬經典車服務中心係橫濱一年一度的「懷舊2日」車展上正式推出，為上世紀90年代中期的WRX和STI車型（GC世代）提供各種零部件，其中包括引擎密封件、前大燈以及諸如密封條之類的易損件。該計畫嘅推出源自一項針對日本斯巴魯車主的廣泛調查，調查顯示，廣大車迷不願出售愛車，更願意長期持有。

掃把佬方面，以一種相當務實嘅方式著手製定其替換零件清單，他們拆解咗高咪數（超過12.5萬miles）嘅車輛，確認故障所在。掃把佬經典車服務專案擁有自己嘅網站，網站上列出嘅零件應該可以透過斯巴魯日本經銷商網路訂購。另外網站上還有一個選項，車主可以提交他們希望看到的升級方案，相當貼心。

相信不久嘅將來會有更多車型支持，對於廣大玩家確實係利好消息。

全球範圍內，STI和WRX車主應該都感同身受，佢地或許並不太喜歡現款WRX的大觸控螢幕和車重，缺少咗過往嘅「純粹」，筆者其實非常希望哩項計畫能夠推廣到全球範圍，確保世界各地嘅大尾翼和「大鼻窿」可以長久陪伴車主。
```
圖片均來自網絡，觀點僅代表作者個人；如果冒犯倍感抱歉，請立刻聯繫我們。
```
2026年7月17日
首次！911推出GT4車型
波子旗下嘅中置引擎跑車 718 Cayman/Boxster 車系正式宣告於 2025 年停產並轉向電動化，因此過往在 GT4 級別賽事與入門競技類型跑車市場叱吒風雲嘅Cayman GT4 已經不再，因此繼任車型將會係不少車迷非常關注嘅重點。而近日波子方面推出咗全新嘅911 GT4 R賽車。係Porsche方面首次以911嘅基礎打造的面向全球GT4組別賽車。

全新911 GT4 R賽車搭載4.0升六缸水平對置引擎，最高馬力可達520匹。賽事首秀定檔2027年，售價26.5萬歐元(不包含各國加值稅)。

GT4組別嘅賽車係全球客戶賽車運動中增長最為迅猛的賽事類別之一。其中，中國超級跑車錦標賽(China GT)、SRO GT杯、SRO日本杯、超級耐久系列賽(Super Taikyu)，以及泰國超級系列賽等賽事，已被視為亞太地區通往頂級GT3賽事人才金字塔的重要一環。因此GT4車型有非常重要嘅戰略意義。

本次嘅911 GT4 R以目前服役當中嘅Cup賽車技術架構為基礎，後者源自於992.2代公路版911 GT3。911 GT4 R於此前718 Cayman打造的Clubsport車型相比，911 GT4 R擁有更強勁嘅引擎、更寬嘅輪距，以及進一步優化的賽車電子系統，顯著提升了圈速成績、操控性能和行駛穩定性。

講講引擎細節，4公升六缸水平對置引擎，明顯就係基於911 GT3同款進行打造，最高輸出達到520匹馬力，最大扭力達470Nm。而根據GT4賽車相關嘅技術規則，性能參數會根據BOP需要而有所調整。例如，911 GT4 R出廠標配進氣限流器(直徑53.7mm)，輸出功率降至430 PS。波箱方面則係狗牙啮合嘅六速序列式波箱，配備四片式賽車極力子。

底盤方面，受限於賽事規則，911 GT4 R與911 Cup採取了不同嘅設定，輪胎寬度均減小一吋，取消GT3車型嘅中心鎖改為常見嘅五孔式輪毂固定方式。此外，Two Way減震器以及三種可選彈簧係數，提供更為豐富的調校選項。

911 GT4 R採用911 Cup嘅主要車身結構，並針對性應用其空氣動力學優化成果同樣根據賽事規定進行咗修改。例如巨大嘅尾翼雖然沒GT3車型咁巨型，但依舊支持11段角度手動調節。大量使用天然纖維複合材料與環氧樹脂相結合。諸如車門、引擎蓋、空氣動力學部件以及座艙內部分零件，均由該材料製成。

進入車內可以見到，車手可通過一塊 0.3吋彩色顯示幕獲取所有關鍵行車資訊。集成式數據記錄儀和高精密GPS系統為賽后分析和性能優化提供有力支援。911 GT4 R配備咗額外的配重組件，可根據BOP不同重量級別要求進行靈活適配。

GT4組別賽車首次於2000年代中期正式開啟，此後已發展成為全球範圍內廣受認可的成熟賽事規格。該組別基於量產車技術嘅同時，有著相對適中嘅運營成本，被視為GT3之下重要的入門級賽事平台。

值得留意嘅係，按照過去波子車廠慣例，此類賽車都會有民用版本推出嘅習慣。過去嘅Cayman GT4車型儘管二手放盤價格不算十分保值，但追捧嘅粉絲數量確實不少。而今次911方面正式推出GT4賽車，是否意味著911日後將會有民用版本嘅GT4車型推出？加上911 GT系列自身嘅「理財產品」屬性，波子方面大概率會推出911 GT4民用款式，不妨拭目以待。
```
圖片均來自網絡，觀點僅代表作者個人；如果冒犯倍感抱歉，請立刻聯繫我們。
```
2026年7月9日