作者: optionfans

  • 原廠電池，車身極致進化，續航可以增加幾多？

    原廠電池，車身極致進化，續航可以增加幾多？

    電動汽車市場目前最大嘅麻煩，都係續航少充電難問題。咁有無技術宅大佬們研究過，一部電動車如果使用普通原廠電動車電池，然後將車身進化到極致，只為續航里程數服務，例如極致低風阻，極致降低滾動阻力以及機械阻力，極致輕量化等等，咁續航會增加多少呢？

    無錯了，就真係有個咁嘅技術團隊，圍繞以上課題，打造了一台超級悭電車。系普通公路上，以大致100 KM 時速巡航狀態，來測試原廠電池（雷諾87 kw/h電池）嘅究極續航里程數。先上結論，公路終極續航里程數超過1000 KM（1083 KM）！對比搭載同款同容量電池的普通電動汽車多一倍。PS：特斯拉等市售主流電動車電池容量也在80kw/h左右。

    係米覺得好型咧，這架雷诺Filante Record專門為破紀錄而生，採用87 kw/h雷諾Scenic E-Tech市售民用車电池。盡量減少入氣口並優化沙板設計，超低矮嘅F1駕駛坐姿，外部零件需要進入風動測試，都係為咗達成最低風阻。

    由法國公司Ligier構建平台底盤以及碳纖維車身，87 kw/h電池則集成在車身中。

    車身採用大量碳纖維鋁合金以及3D打印的Scalmalloy合金零件，同時米其林提供了一套超低阻力的定制輪胎。為左極致輕量化以及緊湊佈局，轉向、製動等系統，全部由電信號控制而非機械。

    雷诺Filante Record喺 10 個鐘內完成了 1000 KM 嘅續航挑戰，全程無充點僅更換駕駛員並保持100+的時速駕駛。測試結束時電池還剩餘11%的電量，使用數學公式推導最終電池將會在1083 KM停止供電。

    一架原廠家用電動車續航500-600公里，但犧牲了駕駛者以外的座位、冷氣機、娛樂系統甚至安全系統之後，即有機會達成1000+嘅續航里程。所以不難理解車廠寧願研究提升電池效率，增加電池容量，也不願放棄產品的實用性甚至技術溢價。所以同樣1000+續航，小編更看好平治EQXX電動跑車嘅概念了。


    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 凌志未來時 RZ 350\500\550\600e F Sport

    凌志未來時 RZ 350\500\550\600e F Sport

    師奶戰車凌志RZ電動車450e北美取得大成功之後，後續車型越來越離譜了，有傳日本本土市場將推最強JDM版本RZ 600e F Sport Performance，屆時雙電機驅動馬力高達420匹。0-100加速僅需4.4秒，配備77千瓦時電池續航里程為525公里。

    當然，頂級旗艦固然吸睛，買家亦可以根據自己實際需要，選擇RZ 350e Version L、RZ 500e Version L 以及RZ 550e F Sport多個配置，其區別續航里程由579 公里到 733 公里不等，配置單電機或雙電機，電池則同樣配置77千瓦時。‌

    一定要留意特別版嘅600e，原廠搭配日本Enkei 21吋大腳，同埋藍色六遮大鮑魚。車身對比550e基礎版Low低咗20mm，而且顏色都非常罕有為圖中嘅中微灰以及白銀色。

    RZ 600e F Sport Performance計劃2026年3月2日日本上市，公佈價格由約78000到80000USD不等，視乎配置以及顏色。

    凌志RZ電動車系列起售價約5.2萬USD（前驅RZ 350e Version L），四驅版本嘅550e F Sport則去到約6.3萬USD，仲有1500USD嘅選裝包可以增強動力以及駕駛樂趣。


    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 本田紅頭精神大起底 Type R 究竟掂唔掂？

    本田紅頭精神大起底 Type R 究竟掂唔掂？

    圖：ENZO / 文：Alex

    掂嘎兄弟，一定掂嘎！紐北最速前驅量產車霸榜至今，剛剛做低埋福士Golf嘅第三版 GTI (Edition 50)；JDM 精神以下剋上，落場斗車前驅家用車推住牛馬倫超跑車尾行，紅頭本田咁都唔掂？咁要做到咩程度先叫掂咧？

    本田思域Type R這一代FL5按順序已經數到11代了，自然又系思域家族當中體型最龐大嘅一款性能旗艦。熟悉嘅紅頭本田K20渦輪引擎，上調到330匹馬力(美版315匹、中版300匹)以及450N/m扭力，關鍵來了，車重只有1440KG。緊湊二驅性能鋼炮咧個領域，只有思域Type R做到最輕量最大化。

    認真觀察會發現FL5個「爆龜」風格非常內斂但係效果異常好，車體巨大但設計上反而預留了更多空間比四個車輪，而不是車內空間。265 30ZR19嘅大寬胎顯得平平無奇，中意「下剋上」嘅車迷有研究過，原廠葉子板就可以塞套315mm大寬胎入去，已經超過部分超跑原廠配置了。

    有野心嘅車迷已經發現，雖然FL5原廠配置Brembo剎車鮑魚，不過車主依然唔滿足。一心落場推超跑，真係後續升級咗更專業嘅高溫型迫力，至於套Slick胎收埋系邊個賽車場嘅Pit房就不得而知了。同埋熱衷跑山嘅車迷則一定了解過，FL5個避震Setting硬到就連紅牛F1車隊韋斯特賓最佳EX，佩雷茲(現凱迪拉克F1車隊車手)都稱，FL5揸起身似F1（咁硬）。

    某種程度上來講，對比VW或者BMW嘅歐式鋼炮，FL5更接近一台賽車，更硬更不舒適，甚至比人感覺更廉價，車貴咗但塑膠感更重。但肉眼可見的輕量化，更圓滑車身風格所以更低的風阻，馬力更大同埋更多黑科技，尤其系前懸部分，同時解決咗動力輸出以及傳動效果嘅種種天生缺陷，一陣升起架車講！

    K20引擎真係經久不衰，不過K20T早就同當年個副8500轉自吸機器毫無關係。如今K20渦輪機可能得7000轉出頭用下，不過扭矩平台則非常可觀，正所謂力大磚飛，馬力即是正義。不過，顯然有違當年嘅「下剋上」JDM精神。

    至於車內感覺，中意嘅人會非常中意。原廠即搭一對賽車桶椅比你，同埋棍波一定會成為主流配置，超重轉向比(從左到右兩圈半)軚感係真戰鬥。滿眼紅色縫線致敬Type R紅頭精神，剩餘嘅廉價或者配置不足係我哋眼中都係「輕量化」。你咁中意豪華，去買歐洲車囉。

    咁除了更輕，更大馬力，甚至更低風阻，咁FL5仲有乜秘密武器可以對抗歐洲鋼炮咧？前提條件系如果單拎一項LSD控制技術，咁FL5系唯一可能輸嘅地方，但不代表動力輸出到輪上嘅工作效率低嚄！ 於是馬上比大家睇一件好嘢，留意FL5嘅前懸掛結構，本田號稱為超級麥花臣獨立前懸掛。

    同普通嘅麥花臣結構略有改進，羊角有獨立嘅轉向結構，即係FL5專向時並不會成份避震機跟住轉，只會羊角單獨旋轉。咁就意味著前輪行走時的確定因素大幅增加，傳動軸穿過羊角直接到車輪，起步響胎或者換擋搶軚的不安定直接消失，全力起步流暢到好似揸后驅車咁！

    細心嘅車迷已經發現咧架FL5上咗唔少白色嘅，馬來西亞UR車體強化結構。無錯，FL5輕量化設計嘅車體系被拉大嘎！尺寸對比Golf或者M2等同級別鋼炮大更多。換套315 Slick胎落場跑下就知道每個彎車架都在扭曲，至於骨質疏鬆嘅傳統治療辦法UR就非常有經驗了。

    車底仲有小小巧思，例如專門積車用嘅紅色鋁合金小支架，再都唔使怕頂花條側裙了(搞到買Type R成日要整車咁)！至於後懸掛，雖然都係多連桿，但肉眼可見的被「輕量化」處理了。蝦鬚目測並不算粗壯，睇來套避震系堅嘅硬。有人話系電調避震機Setting問題，不過可以硬到佩大師都稱讚，估計就真係連彈簧都系高磅數Setting，撐恆曬。

    總結來講，為左快，或者為咗保住個紐北前驅王座，FL5犧牲得有點多了。「下剋上」JDM精神對應FL5嘅價錢，已經所剩無幾。目前本田打敗歐洲列強嘅武器，當然不可否認套「超級麥花臣」功不可沒；不過更多都係對機器嘅壓榨，以及對不舒適嘅妥協。相信由細睇思域Type R到(年紀)大嘅車迷朋友都接受唔到，駕駛一架打軚都几重嘅棍波FL5作為每日通勤(晨運)工具，我明明可以揸架自動波Golf嘎！

    中意JDM？中意落場「下剋上」推住班超跑來行？又擔心無地方升級檢查部戰車？特別鳴謝升革（Singer）汽車科技嘅支持。

  • IMEXPO車展新勢力大集合 電車科技令人驚歎

    IMEXPO車展新勢力大集合 電車科技令人驚歎

    图：Steve/Meipo 文：Alex

    同Tokyo Auto Salon Hong Kong（TAS-HK）同期同場地一連四天的 IMEXPO車展，於星期日(14/12)完滿閉幕。IMEXPO 新車車展，今次主要內容屬於國內的電動車「新勢力」。一進場就看到兩大品牌打對台 MG vs BYD。這兩大品牌的電動車在香港已銷售了數年，BYD 已經成為香港電動車市場的銷售冠軍，以其價廉物美取勝。

    不過過去一年，MG 的成績也不錯, 在馬路上開始看到很多MG不同款式的電動車，加上近月推出了它的電動跑車Cyberster，亦成為城中焦點。在萬綠林中一點紅的環境下，小編反而對MG的新款混能車ZS HEV更加感興趣！

    ZS HEV 配置了1498cc 的發動機及1.83 KWH 的鋰電池。一般市區行駛，時速70公里內場景會使用電能；到高速公路奔馳的場景，時速超過70公里，就會自動轉換為發動機驅動，並向電池充電。

    據銷售人員描述它的續航能力非常高，一缸汽油可以行駛700公里。小編雖然不是電動車的愛好者，但覺得這一款混能車就非常適合小編自己日常代步工作的場景，一方面非常慳油，但又不需要忍受排隊等待充電的尷尬。

    豐田TOYOTA展區

    豐田TOYOTA作為進口車非常有誠意，感覺上，唯一有認真同班中國電動車打擂台的進口牌子。車型方面則派出空間實用的BZ3X出展，車尾多功能露營灶台展示非常有趣。技術打唔贏但比別家更有趣更快樂也不錯。

    ZEEKR展區

    ZEEKR屬於中國吉利集團旗下高端品牌。車迷朋友對ZEEKR的認知可能還停留在WTCR藍色冠軍賽車，不過今次帶出來是誠意滿滿的高顏值車型，包括同保姆車搶佔緊市場的大型MPV ZEEKR 009以及大型SUV ZEEKR 9X，同埋顏王007 GT性能轎跑車型等。

    更多進口品牌

    進口車方面都唔執輸，歐洲車奧迪帶來電動SUV以及Wagon；韓國車KIA小鋼炮EV6特別版拉花非常搶眼；日本車方面萬事得都有純電車型SHOW出來，日產就展示翻多功能以及實用性。

    零跑汽車LEAPMOTOR展區

    零跑汽車可能大家不太熟悉，是中國浙江省一家以智能駕駛、自動駕駛、智能聯網為主要特點的汽車廠商。零跑自主研究芯片同埋做AI駕駛分析，華為的鴻蒙系統也是零跑汽車的合作夥伴之一。在自動駕駛方面零跑其實非常強大，目前L3級自動駕駛出租車聽聞已經上路經營。

    五菱汽車WULING展區

    來自中國廣西省柳州地區的五菱汽車，一個以一己之力抗衡日本K-Car文化的存在。這個單一品牌全球銷量大於日本所有品牌K-Car銷量的總和，即使就連小編都感覺到五菱汽車的設計過於世俗，大陸更加笑稱為「老頭樂」，但是銷量同埋價格硬實力就擺在當前，不得不佩服。

    廣汽GAC展區

    廣汽集團GAC經常回鄉翻廣東的朋友就非常熟悉了，其中以AION為年輕市場代表，廣東能見度極高的一個高性價比電動車品牌，包括網約車的佔有率都非常高。十几年前，廣汽集團代工的本田Fit受到廣東年輕人追捧大熱賣，近幾年Fit銷量嚴重下滑，目前很多廣東人會選擇用車成本更低，車體更大，甚至性能更好的AION UT作為替代。

    其他國產品牌

    今次IMEXPO車展，還有吉利、奇瑞等老牌中國廠商參加。尤其奇瑞展出的「天門山999級階梯攀爬大挑戰網紅越野車」，據了解原來在大陸都有巨量改裝粉絲，不過基本上是玩外觀以及玩露營、擺攤等功能。

    總結來講，中國電動車目前最大的賣點依然是便宜、大空間、功能豐富，正所謂「大件夾抵食」。至於主推的智能駕駛甚至自動駕駛，小編個人就採取觀望態度了。

  • 寶馬純血M3末代V8大自吸輕改出街

    寶馬純血M3末代V8大自吸輕改出街

    圖：ENZO / 文：Alex

    今日來講下寶馬性能車嘅純正血統。先入為主咁講句，寶馬性能代表一定係M3 E46，當年號稱駕駛者之車，高轉自吸NA風格經典代表。但係當年高轉自吸實在太多了，龍爭虎鬥嘅年代，尤其日本車喺咧個範疇玩到風生水起各種紅頭引擎應接不暇。或許就連寶馬都需避其鋒芒，劍走偏鋒，由E46 M3（97-06年）單純嘅高轉自吸，蛻變成內容更為豐富嘅大排量V8豪華高轉自吸，於是就誕生咗咧架豪華舒適嘅E90 M3（05-14年）。

    喂~咁點解E90之後嘅M3就唔純正嘅？第一，E90後M3全線渦輪化；第二，E90之前叫E46上代叫E36再上叫E30，E90之後呢？叫F80嚄，咁你話純唔純正啦。

    咧架M3原廠動力輸出420匹，扭矩為400Nm，V8佈局排量4公升8400轉機器，升功率剛好過百去到105匹/升。大家都知道M3 E90點解係末代純血，之後M嘅繼任者全線渦輪化，而且再無V8、V10咧d動聽歌仔唱。渦輪淡化了排量帶來的意義，如今渦輪改裝已經唔講升功率，大家都中意講渦輪壓力值，打到1.2Bar定係1.5Bar？但係100匹/升喺自吸NA引擎嘅世界，就係判定是否性能機嘅重要門檻。

    留意引擎入氣口係對准前Hood通風孔，副大V8係可以直接吸入鮮冷生風，咧個設計可以區分性能車及家用車。

    對比動力升級，車主更中意去裝飾咧副代號為S65嘅經典V8偈。

    講真，400匹出頭咧個動力級別，放係今時今日確實只係4缸2.0T動力嘅輸出級別。買新款寶馬三係2.0T配置高功率版本，稍微作ECU調教都可以獲得同等動力。但我哋係V8上獲得嘅樂趣，來自於優雅嘅動力輸出方式以及聲浪響應。8400轉嘅V8喔，疊加4缸Double嘅音頻，而且全段死氣並無渦輪遮擋，聲音直接且乾淨。

    M3全車標配防滑皮Alcantara，可能短裙妹妹覺得唔夠親膚，但係對車手來講這才是心頭好。

    可惡嘅就係自動波來嘎？E90咧一代M3都有棍波版本可供選擇。

    所以對於Keep到一架咁特別嘅「駕駛者之車」嘅車主來講，動力升級確實並非必要，更重要嘅係延續個種線性嘅駕駛樂趣，又或者係增加一點「駕駛過程中」嘅樂趣。既然係舒適型性能車，咁點解唔可以更豪華呢？所以全車音響升級又變得比較重要了。

    邊有人影人車底嘎？咦，污糟邋遢！不過睇車底先知道係人玩車定車玩人了，你睇下條蝦鬚几粗。

    其實絞牙避震主要作用係調整前後高低同阻尼，而藍色條HardRace則為咗解放後輪參數嘅調整模式。

    大部分UR件包括引擎艙入邊嘅頂Bar都係為左車架強化服務，同時兼顧被動安全性能同埋壽命。

    至於來自路面嘅駕駛樂趣，車主更加中意係原有基礎下「清晰化」咧架M3嘅特點。例如升級全套絞牙避震以及搭配HardRace去調整底盤參數，親自參與Setting一套最適合自己嘅底盤模式。又或者考慮全套UR車體強化方案，等前后端感覺都更加敏感。P Zero性能胎搭配AP Racing剎車則實實在在咁令到部車更加聽話，屬於效果很直接嘅改裝升級。

    當然了，我哋作為車迷去睇一架改裝車可能只係輕描淡寫嘅欣賞。當你真係Keep到一部自己中意嘅車，並想方設法去優化距令自己更中意，或者延續其壽命令距可以陪伴自己更長時間，試過就知道並唔簡單嘎！金屬會疲勞、杯士會老化，偈油、迫力油、車胎定時定候都要Check。如果話養小動物嘅人多數有愛心，咁玩車嘅朋友就一定會有耐性。

    BTW另一種情況，就係車玩得企理未必全賴車主悉心照顧，都有可能係搵到咗一戶「好人家」去幫手打理，定時定候有溫馨小提示愛車夠鐘Check偈油、夠公里數換胎了。

    特別鳴謝：升革（Singer）汽車科技。

  • Gymkhana2025爆改掃把佬貨兜仔橫劈澳洲大陸

    Gymkhana2025爆改掃把佬貨兜仔橫劈澳洲大陸

    Gymkhana飄移大片2025上新又可以大飽眼福了。喺澳洲大陸合法拍攝，採景全景山賽道、悉尼碼頭以及澳洲大沙漠，依然由Hoonigan公司製作，依然係使用掃把佬經典車型爆改。熟悉嘅配方熟悉嘅味道，就算創始人Ken Block已經仙去但精神源遠流長。

    不過今次選擇嘅車型非常特別，一款90年代嘅Subaru Brat，一款面對澳洲大陸獨有嘅小型雙門單排貨兜仔，自帶地域特色——防袋鼠泵把。其中最特別係貨兜內居然仲有兩把「膠凳」配套扶手，所以嚴格來講，Brat係一款四座車。

    今次Brat Gymkhana戰車由於體型對比「上代」嘅掃把佬GL旅行車原型，體型大幅縮水，所以動力方面放棄咗原有嘅H6水平對置引擎，而定制咗一款超高轉速嘅H4機器，馬力為670匹。轉速可以上到9500+，具體就要睇特技車手Travis Pastrana嘅換擋時機了。

    不過好消息就係，保留咗主動空力系統，每次剎車都可以見到擾流板全開。而且今次更加誇張，留意貨兜後邊個巨型可變尾翼。同埋Brat經典設計貨兜裡的膠凳，升級成為碳纖維製品，並且配備咗四點式安全帶。為左見證其實用性，視頻中仲穩咗兩位仁兄座後面兩張兜仔凳原地燒胎。

    最重要嘅系防袋鼠泵把嘅升級，原廠個條金屬防撞Bar已經被替換成碳纖維Bar；同埋車內好貼心咁保留咗原廠收音機。

    請觀看原片（视频原地址：https://youtu.be/daYgg2YSA2g?si=RsO80UIjswsi_eaa）


    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 最保值嘅11架車，裡面有無你架前漆咧？

    最保值嘅11架車，裡面有無你架前漆咧？

    2025來自美國Hagerty一個非官方但又頗為權威嘅統計，公佈咗價格普遍看漲最保值嘅11款中古車，而且都係可以喺二手市場買到嘅真實車源。其中由名貴跑車、超跑到大家都買得起嘅家用轎車，甚至Pickup工具車都囊括其中，年份跨越咗70年。

    雪佛蘭 Corvette Z06 （2006-2013）估值55,900 USD

    搭載7.0公升引擎505匹馬力，毫無爭議嘅美國國寶級跑車。到現在為止距嘅繼任者，賣點都係靚仔+強大+平！

    寶馬M5（2006-2010）估值36,000 USD

    最後一款寶馬大排量自吸，最後一款V10引擎，最後嘅寶馬純血精神領袖，有成500匹馬力！不過唔知車主們備用引擎件搵好未咧？

    波子 Carrera GT（2004-2007）估值1,550,000 USD

    《狂野極速》中已故影星保羅·獲加嘅奪命追魂車，但更有價值嘅一樣系V10自吸引擎而且有棍波，同埋當年地表最強調教嘅名聲。

    萬事得 MX-5 Miata（1999-2005）估值16,600 USD

    一個被玩咗二十幾年嘅至今依然流行嘅開口笑「表情包」，移動嘅小浴缸，有樣有樂趣，廉價容易Keep得住。

    福士 Golf GTI VR6（1995-1998）估值20,000 USD

    第三代GTI搭載172匹V6引擎，而且距仲系一款橫置機器，其魅力除咗個樣夠薯仔，聲浪動聽都係一個賣點。

    日產 Skyline GT-R（1995-1998）估值82,350 USD

    既然有美國國寶級跑車，就一定會有日本國寶級跑車了。不過亞洲人受《頭文字D》影響中意R32、R34，美國市場更偏愛呢款圓滑嘅R33。

    雪佛蘭 454 SS （1990-1993）估值59,800 USD

    美式性能Pickup嘅開山之作，極度簡潔同埋廉價，地位於美國農民相當於街頭飛仔見到紅頭本田咁。

    道奇 Ramcharger （1981-1993）估值25,300 USD

    而呢款就係美式大排量SUV嘅開山作品，雖然擺明就係Pickup加個玻璃罩，但係放眼今日又幾好睇。

    愛快·羅密歐 GTV（1969-1972）估值105,000 USD

    美國人心目中嘅第一架義大利名貴跑車，經典風冷波子嘅平替，到今時今日依然有廠家生產復刻版本嘅GTV，原版本嘅價值就更加唔使講，問題系目前價格可能已經超過波子。

    道奇 Charger（1968-1970）估值91,450 USD

    美式肌肉車嘅開山代表作，影視硬漢嘅標配。Charger唔但只係一款汽車，距更加係一個流派咁嘅存在。

    Continental Mark II （1956-1957）估值82,700美元

    當年美國最貴嘅汽車，屬於美式豪華車咧個流派嘅開山之作，出乎意料嘅實用性以及精緻，而且非常有歷史紀念意義，不過咧種意義可能僅限於美國本土。


    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 兩分優勢險奪WDC 木瓜新王誕生

    兩分優勢險奪WDC 木瓜新王誕生

    首先係2025 F1收官戰阿布扎比，迎來F1歷史上全新嘅車手世界冠軍——Lando Norris蘭度羅禮士（NOR）。

    NOR係F1歷史上第35個世界冠軍

    NOR係第11個英國國籍F1世界冠軍

    NOR係麥拿倫車隊繼2008年之後第一個車手世界冠軍，無錯上一個係咸美頓（HAM）

    NOR 7年職業生涯之後奪冠，而且7年都係麥拿倫車隊擔任正式車手

    不過今次奪冠過程真係非常驚險，雖然帶著12分差嘅優勢進入終局，但最終結果都只係險勝4冠王紅牛車隊韋斯特賓（VER）2分而已。

    回顧上站卡塔爾平治新人王安東尼利（ANT），最後圈失誤讓出2分比NOR被全網網暴事件，不禁又令人事後再驚出冷汗。畢竟今日VER屬於Pole to Win收官，奪得2025 F1賽季最多冠軍數以及桿位數，都係8個，即使最終同分NOR都不足以勝出。險勝2分，網暴有理！

    至於另個一非常重要，有機會左右WDC走向嘅車手，居然係已經宣佈離隊嘅紅牛車隊二號車手角田裕毅（TSU）。排位賽日本人就少有殺入Q3並為左VER嘅桿位，放棄所有全力準備幫助VER喺大直路拉尾流。結果當然係成功將VER拉成桿位。

    不過正賽紅牛車隊策略都非常明顯，TSU硬胎起步壓制黃胎提前入站嘅NOR，企圖復刻2021年佩雷斯壓制HAM整整7秒奠定VER首冠咁。TSU係電台積極回復車隊「交俾我喇！」結果係一條大直路都壓制唔到，自己仲喜提5秒罰時，理由係將多次變線將NOR推出賽道。

    至於嬲嬲豬嘅麥拿倫車手皮亞斯特利（PIA），嬲到收官戰第一圈就做低隊友NOR，搞到策略被動全程只能死守P3，硬抗無啦啦彈起嘅法拉利路克萊（LEC）。

    同NOR同樣係本賽季贏咗7個分站冠軍，雖然有評論認為其表現優於NOR更加激進，擁有更強大嘅戰鬥慾望以及能力，但係始終係揸唔就手嘅賽道過於不穩定而丟失WDC。當然，所有車迷都會認為上站卡塔爾係車隊愚蠢嘅策略整唔見PIA嘅分站冠軍噶！

    完結散花，感謝陪伴！2025賽季完美詮釋咗咩叫：直到最後一刻都有不確定性。F1 2025係繼2021之後最精彩繽紛嘅一個賽季，同時都係地面效應空力規則（2022-2025）嘅最後一個賽季，同時又係歷史最巨型F1賽車嘅最後一個賽季。2026年開始，F1比賽將進入小型化+油電混合動力+主動空力時代，新一輪嘅規則元年註定大混亂，三個月後準時開波。

    2025 Drivers’ Standings

    Pos.DriverNationalityTeamPts.
    1Lando NorrisGBRMcLaren423
    2Max VerstappenNEDRed Bull Racing421
    3Oscar PiastriAUSMcLaren410
    4George RussellGBRMercedes319
    5Charles LeclercMONFerrari242
    6Lewis HamiltonGBRFerrari156
    7Kimi AntonelliITAMercedes150
    8Alexander AlbonTHAWilliams73
    9Carlos SainzESPWilliams64
    10Fernando AlonsoESPAston Martin56
    11Nico HulkenbergGERKick Sauber51
    12Isack HadjarFRARacing Bulls51
    13Oliver BearmanGBRHaas F1 Team41
    14Liam LawsonNZLRacing Bulls38
    15Esteban OconFRAHaas F1 Team38
    16Lance StrollCANAston Martin33
    17Yuki TsunodaJPNRed Bull Racing33
    18Pierre GaslyFRAAlpine22
    19Gabriel BortoletoBRAKick Sauber19
    20Franco ColapintoARGAlpine0
    21Jack DoohanAUSAlpine0

    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 不屑使用入站免費券，後果嚴重，連滾帶爬！

    不屑使用入站免費券，後果嚴重，連滾帶爬！

    因為參考歷史原因，喺2025 F1卡塔爾站，FIA正式引入了類似於蒙地卡羅嘅25圈內強制入站，從而達到了保護輪胎提升比賽安全性嘅指令。不過咧，喺2025尚未決出WDC嘅倒數第二站，呢個看似無聊嘅安全指令，又貌似變成咗一個不大不小嘅變數。

    其實2025卡塔爾站本身個看點就唔複雜嘎！由週五衝刺賽排位開始積分領跑嘅麥拿倫就順風順水，追分者紅牛車隊韋斯特賓（VER）各種不順，始終慢半秒，頭排都上唔到。睇形勢就麥拿倫內鬥爭冠，連續頹廢嘅81號皮亞斯特利（PIA）終於喺高抓地賽道壓制隊友4號仔羅禮士（NOR）。順利嘅話，VER會提前失去爭冠希望，而PIA同NOR甚至可能個位數分差進入收官。

    又回到靈魂拷問：你相信劇本嘛？但事情就係咁有趣，P1發車嘅PIA喺正賽57圈正賽嘅關鍵圈第7圈，大會全場派發免費入站劵——安全車出動，事因車陣後方碰撞有車損。由於開頭提到，本站25圈內強制入站，於是面臨一個不太難嘅優惠選擇：

    A、享受優惠，第7圈安全車期間完全免費入站，條件係，剩餘50圈剛好兩個上限Stin，即係準確要第32圈入多一次站，避免觸發25圈嘅超限違規。

    B，不享受折扣，換取更靈活嘅入站策略。同埋搏下一次安全車。

    但係事實上就係，除了麥拿倫車隊，所有車隊都選擇了免費派送嘅入站折扣劵，而犧牲入站靈活性。傲慢的麥拿倫，認為自己仲係火星車，可以喺50圈比賽中輕鬆拉出一個26秒嘅入站窗口。即係平均一圈拉開半秒以上，仲要計埋超車，仲要入多人地一次站。個種感覺咧，正正好似2021年，五盞紅燈熄滅，只有劉爵士起步嘅名場面。

    可能係排位賽確實有半秒優勢在手，搞到策略組真係夠膽死攞WDC來賭博。甚至因為木瓜規則（公平競爭）就連兩個車手之間嘅差異化策略，即兩頭押，都懶得去做。結局就係，PIA跌落車陣當中，超車導致輪胎提前耗盡，無法貼近免費入站上升P1嘅VER（VER全力Push防守）。最後PIA P2，直到最後一圈距離VER嘅秒差仲有10秒+，充分暴露麥拿倫堪憂嘅數學水平！

    積分榜首嘅NOR更慘，完全被其他車隊壓制，喺P5位置捱到最後一圈，先借助前車平治車隊新人王安東尼利（ANT）自己失誤超翻到P4止損。事後仲引發全民網暴話麥拿倫作為平治引擎嘅客戶車隊，ANT故意讓車，平治車隊收到神秘電話等等鬧劇。

    而結局就係，面對免費折扣麥拿倫仲猶猶豫豫，紅牛策略組就成為咗第一個正確使用免費劵嘅車對，並幫助VER登上卡塔爾的冠軍寶座。神奇就係威廉士都因為正確使用入站免費劵，小車隊成功逆襲登上領獎台，甚至成功壓制麥拿倫嘅NOR。

    於是到收官站阿布扎比之前，VER強行將2025大結局拉入三人爭WDC嘅局面。目前NOR僅有12分優勢，VER積分反超PIA 4分。VER終於逼到麥拿倫車隊：本該是從從容容游刃有餘，現在匆匆忙忙連滾帶爬，完全無曬任何犯錯空間。如果今次卡塔爾嘅失誤喺收官站再次復現，麥拿倫有可能會失去車手WDC。


    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 感謝您的留言

    Thank you for your message

    返回首頁