作者: optionfans

Words@Alex / Photography@Enzo

「喂，跑車就梗係要跑架啦，跑山！跑賽道！唔係買嚟做乜呀？」相信大部分車迷見到個標題都會想笑。當然唔使你教，有冇一種可能，就係大部分貴價跑車買翻嚟，都係社交工具或者叫「身份嘅象徵」？類似於，社交場合所需要的衣著打扮，名牌西裝名牌手錶。

所以有理由相信，咧台200萬港元級別嘅Aston Martin Vantage F1 Edition車主，唔止一台車在手。咧台限量版只係其中一台收藏品，不排除車主會好似占士邦咁，擁有成個軍火庫！講完笑，我哋今次可以一邊拍攝，一邊用各種細節去論證F1 Edition，更加適合社交，而唔係賽道。

提問！Aston Martin Vantage F1 Edition，同普通Vantage有乜唔同？眾所周知F1 Edition係Aston Martin汽車公司向F1等賽事提供嘅安全車，於2021年開始和Mercedes Benz AMG GTS共同負責FIA旗下部分賽事的安全車輪值。

F1 Edition性能上對比普通2020款Vantage進行咗微調，賬面動力輸出達到534Hp馬力，扭矩為685N.m，動力部分搭載一台來自Mercedes代號為M177嘅4.0T引擎，而車重只有1570KG。放眼當今性能車電氣化時代，Vantage感覺上屬於輕型跑車了。呔鈴方面採用前19寸265/35 ZR19後20寸295/30 ZR20搭配，原廠車胎標配義大利輪胎品牌Pirelli(派拉利)P0系列。

咧款「馬田」大嘴已經由60年代007占士邦戰車DB5流傳到現在。

咪住，資深車迷即刻發現唔妥！作為Vantage同平台嘅姐妹跑車，Mercedes AMG GTS搭載編號M178引擎，配置咗更性能嘅乾式賽車油底殼。而Vantage配置了民用車常的見濕式油底殼，引擎代號M177，則來自於Mercedes另一台緊湊型房車C63s。哇，平治公司擺明大細超喔！

因為需要重心居中增強彎道性能，引擎前中置，所以車頭太長，引擎上方做了三角結構補強。

避震機塔頂佈置咗智能化機芯電調系統，可以通過駕駛模式去改變機芯阻尼等參數。

生風直接喺車頭「馬田大嘴」吸入風箱，車速越快入風越多，電單車領域稱之為「衝壓式進氣」。

「堅」機蓋開孔，令筆者聯想到近排好Heat嘅某米電動車高性能選裝包。當然，價錢唔一樣無可比性。

作為社交場合多於賽道運動嘅跑車，引擎震動控制、機械噪音水準，或者先係出廠時更被關注嘅指標？而駕駛時可感受軚盤非常輕手，軚盤轉向比對比普通私家車反而更細，轉向異常直接激進，俾人一種玩遊戲機直接將靈敏度拉最高嘅錯覺。或者可以印證車廠刻意讓Vantage去迎合普通駕駛者，而非賽車手，即使仲有F1安全車嘅任務在身。唔怪得知F1車手拉素爾比賽時喺電台吐槽Martin安全車帶得太慢啦！

2020年發佈上代Vantage之後，F1 Edition跟著就喺2021年發佈，馬力微微上調咗30hp。對於馬力500hp級別嘅跑車來講，可能只係寫個ECU程序換套死氣喉嘅區別。但F1 Edition全球限量500台，明顯更加保值，適合收藏，並凸顯社交屬性。目前新款Vantage2024已經發佈且性能大幅提升（基礎款高達600hp馬力），若有興趣入翻台舊款Vantage嘅車迷朋友，一定要認實個F1標！

最後講個秘密大家聽，F1 Edition雖然是後置波箱，但係波箱被佈置喺車尾最低位，所以後備箱可以用空曠來形容，可以放全套高爾夫球具再加台折疊單車（私人物品太多不方便拍攝）。

仲有，F1 Edition聲浪同Vantage風格唔同，前者聲線會更「邋遢」，而後者更斯文。

以上觀點僅代表作者個人。