标签: Williams

  • 兩個只能活一個?比利時大獎賽Russell退賽Kimi再次奪冠

    兩個只能活一個?比利時大獎賽Russell退賽Kimi再次奪冠

    2026 賽季 F1 第十站比利時大獎賽於7 月 17-19 日來到了比利時Circuit de Spa-Francorchamps。Spa-Francorchamps坐落於比利時阿登森林(Ardennes Forest),全長7.004公里,是F1賽歷上單圈距離最長的永久性賽道,正賽共44圈,正賽比賽里程為308.052km。整條賽道穿行於山谷與森林之間,賽道各區域海拔變化較大。約80%的單圈里程處於全油門狀態,這對動力單元、輪胎和車手體能都是極限壓榨。

    賽前官方文件顯示本站將設置有5段直路模式(Straight Mode)啟動區域,超車模式(Overtake Mode)探測點和啟動點在19號彎前後。Eau Rouge與Raidillon (T2-T4)高速彎組合是賽車空氣動力學極限的標誌,Kemmel 超長直路模式啟動區預計會產生不少精彩鏡頭。

    排位賽單圈最大充電能量為7.0MJ,正賽單圈最大充電能量為8.5MJ,超車模式(Overtake Mode)下單圈最大充電能量為9.0MJ。

    Pirelli為本站帶來了C2(硬胎)、C3(中性胎)、C4(軟胎) 三款乾地輪胎配方。

    排位賽—–

    在香港時間週六晚上進行的排位賽(Qualifying),Mercedes車隊的Kimi Antonelli以1:44.361奪得杆位,獲得個人本賽季第6個杆位,這是 Mercedes 車隊在 2026 賽季現時為止全部 10 場大獎賽中第 10 次奪得杆位。Red Bull 車手 Max Verstappen 落後 0.317 秒位列第二,McLaren 車手 Lando Norris 跑出 1:44.801 原本位列第三,但因更換動力電子單元被罰退 10 位起步。

    Q1被淘汰:Albon(Williams)、Ocon(Haas)、Bottas(Cadillac)、Perez(Cadillac)、Alonso(Aston Martin)、Stroll(Aston Martin)

    Q2被淘汰: Lawson (Racing Bulls) 、Gasly(Alpine)、Colapinto(Alpine)、Hülkenberg(Audi)、Sainz(Williams)、Bearman(Haas)

    Q3 第一輪飛馳圈 Norris 表現驚艷,在第二計時段(S2)做出全場最快,以 1:44.801 暫列第一,領先 Antonelli 0.039 秒。Oscar Piastri 在 Stavelot 出彎輕微失誤掀起大量砂石,賽會出示紅旗,暫時中斷比賽以便清理賽道。紅旗結束後最後4分鐘10部賽車陸續出場進行最後一輪飛馳圈。Red Bull 安排因超標更換部件被罰至隊尾起步的 Hadjar 為 Verstappen 提供尾流, Verstappen因此提升約 0.3 秒至 1:44.678,短暫佔據第一。Antonelli 隨即以 1:44.361 反超,強勢奪得杆位。

    由於Lando Norris被罰退 10 位起步, George Russell上升至第三起步。Ferrari 兩位車手 Charles Leclerc 與 Lewis Hamilton分列 第四和第五位。

    正賽—–

    五盞紅燈熄滅,所有賽車順利進入一號彎。Max Verstappen 在 La Source(一號彎)超越 Antonelli,但隨後被 Antonelli 與 Leclerc 雙雙反超。後方 Lewis Hamilton 與 George Russell 發生碰撞,Russell 失控衝入砂石地無奈退賽,賽會出動安全車。

    安全車結束後,Verstappen 做出當時最快圈速的同時超越 Leclerc 回到第二位。Leclerc 在此過程中與身後 Piastri 發生碰撞,Piastri 賽車有部件掉落,經賽會調查後兩位車手均未受到進一步處罰。

    第 9 圈,Hamilton 超過 Piastri 升至 第四位。隨後賽會宣布因此前與Russell的碰撞,Hamilton被處以5秒罰時。

    第 18 圈,Verstappen 進站換上硬胎,試圖以 undercut 反超,隨後一圈 Antonelli 也進站換上硬胎。

    第 20 圈因需清理賽道內的碎片,賽會出示虛擬安全車(VSC)警示,Ferrari 藉此上演同圈進站,Leclerc 與 Hamilton 同時換上硬胎。Leclerc憑着VSC下進站耗時更少的優勢超越 Antonelli 暫時領先比賽,Hamilton 也完成 5 秒罰時。第 22 圈,Norris 被 Leclerc 超越,Leclerc 正式成為新的領跑者。第 26 圈,Antonelli 超越 Norris 回到第二。

    第 29 圈,Verstappen 也超過 Norris,Antonelli 追到 Leclerc 身後約 2.2 秒。

    第 30 圈,Antonelli 進一步將差距縮小到 2 秒左右。Norris 在本圈進站換上中性胎,但 McLaren 車隊換胎時左後胎卸不下來,導致本次進站耗時長達7.8 秒,Norris 大半場的努力追擊基本清零,出站後他落到 Bortoleto 身後,暫列第八。

    第 34 圈,Antonelli 完成對Leclerc的超越,重新奪回第一位。最終Antonelli 順利將第一維持到最後,成功奪得本站冠軍。

    Mercedes 本賽季已經有5個分站只有一部賽車完賽得分,今站Russell早早退賽也為其對世界冠軍爭奪造成沉重打擊。Leclerc與Hamilton本站繼續雙雙有好表現,在車隊與車手積分榜繼續與Mercedes保持競爭懸念。由於Kimi贏得本站冠軍,Russell在車手積分榜從落後 Antonelli 25 分擴大至 45 分,並且再度被 Hamilton 超越跌落第3位。Verstappen本站獲得第3名也為Red Bull達成隊史第300次頒獎台成就。

    7月24至26日F1將會進行夏休期之前的最後一站——匈牙利站,屆時在一條與本站賽道特性完全不同的賽道進行比賽,意味着完全不同的能量部署策略。還有此前外界盛傳Aston Martin將會帶來改頭換面的升級,小編個人的確有幾分期待,畢竟自2026新規實施以來,該隊一直沉寂至今,届时升級實際效果如何,我們拭目以待。

    圖片均來自網絡,觀點僅代表作者個人;如果冒犯倍感抱歉,請立刻聯繫我們。

  • 掃把佬正式推出經典車計劃

    掃把佬正式推出經典車計劃

    隨住掃把佬Impreza車型嘅年歲增進,曾經都覺得頗為後生俗稱「789代」嘅GD世代都已經邁入咗二十年關卡。而GC世代更唔使講早已經進入「Classic Car」嘅行列。車年是已高加上原廠零部件陸續停產,對於唔少用戶或者玩家而言,繼續去持有一台Classic Car都係一個比較高難度同高投入嘅課題。此前筆者認識咗一個GC車型玩家,部分零部件嘅停產甚至令佢要去嘗試自己去進行復刻,特別係某類關鍵部位嘅橡膠件,密封件,塑料部件。

    正好有個消息,掃把佬方面正在傾聽其最熱情嘅車主意見,並為 GC 世代嘅 WRX 和 STI 提供替換零件。實際上其他日本製造商如萬事得同日產,都有類似服務,而且最初只係日本提供傳統零件支持,但後來擴展到美國市場。按照掃把佬方面嘅規劃,暗示其他車型都會好快獲得相應支持,甚至包括早期的美國市場車型。

    掃把佬目前嘅Heritage Service Program最初僅限於日本市場服務,主要針對基於GC底盤的WRX和STI車型。然而其他汽車公司提供的零件項目最初都係日本進行試點,理論上只有日本車主才能享受到這兩家公司提供的原廠修復服務,不過零件最終都開始在海外銷售。所以對於香港嘅GC車主,實際上唔存在太大購買難度,無非都係日本網站直接購買。

    官網上面有相關配件列表,有興趣嘅車友不放上去睇睇有無心水零件

    至於GD世代「蟲眼」「淚眼」「鷹眼」WRX和STi嘅車友都唔好灰心,有好消息:掃把佬好有可能會開始著手GD世代,實際上目前GD世代零件依舊在產,尚未完全停產,加入經典車計劃後,相信部分停產零件會得以復產。放眼全球,美國市場對掃把佬至關重要,而且新世代STI車型目前又處於停產狀態。因此掃把佬方面會有相關計畫正在醞釀之中,有可能為美規STI即將迎來25週年紀念之際,推出相關車型嘅經典車服務。

    講翻目前日本方面嘅規劃先,掃把佬經典車服務中心係橫濱一年一度的「懷舊2日」車展上正式推出,為上世紀90年代中期的WRX和STI車型(GC世代)提供各種零部件,其中包括引擎密封件、前大燈以及諸如密封條之類的易損件。該計畫嘅推出源自一項針對日本斯巴魯車主的廣泛調查,調查顯示,廣大車迷不願出售愛車,更願意長期持有。

    掃把佬方面,以一種相當務實嘅方式著手製定其替換零件清單,他們拆解咗高咪數(超過12.5萬miles)嘅車輛,確認故障所在。掃把佬經典車服務專案擁有自己嘅網站,網站上列出嘅零件應該可以透過斯巴魯日本經銷商網路訂購。另外網站上還有一個選項,車主可以提交他們希望看到的升級方案,相當貼心。

    相信不久嘅將來會有更多車型支持,對於廣大玩家確實係利好消息。

    全球範圍內,STI和WRX車主應該都感同身受,佢地或許並不太喜歡現款WRX的大觸控螢幕和車重,缺少咗過往嘅「純粹」,筆者其實非常希望哩項計畫能夠推廣到全球範圍,確保世 界各地嘅大尾翼和「大鼻窿」可以長久陪伴車主。

    圖片均來自網絡,觀點僅代表作者個人;如果冒犯倍感抱歉,請立刻聯繫我們。
  • 廣東阿爾卑斯山 自駕即達 兩種玩法

    廣東阿爾卑斯山 自駕即達 兩種玩法

    圖:Alex / Mann

    自從港府大陸之間,開放咗廣東自駕回鄉之後,真係非常利好中意自駕遊嘅車友。當然啦,雖然自駕遊範圍僅限廣東地區,不過今次對於廣東地區千篇一律的亞熱帶「綠色」風情,我哋亦可以睇到不一樣嘅風景地貌。

    自駕遊直達,進入廣東之後下載一個「高德地圖」導航APP,然後搜「浮日藍礦咖啡」,開啟今次自駕啦!

    根據導航帶路,順利的話三個鐘車程,我哋會去到佛山和肇慶嘅交界處——一個群山環繞但係光禿禿嘅地方。如果客流量巨大,可以考慮提前停車係半山停車場,然後一小段階梯拾級而上就會到達目的地。體能零要求,無需任何裝備,注意防雨防曬即可。

    歐洲最靚嘅景點,一定走唔甩阿爾卑斯山;中國最出名美景,一定會有西藏深處神秘而美麗嘅「日照金山」。而兩者共通之處,就係都會有高山寒帶寸草不生嘅禿石峰頂,尼樣嘢係地處亞熱帶兼並無高海拔山峰嘅廣東,實在不敢想象。

    但係充滿想象力嘅廣東人,就係可以喺亞熱帶平原,「模擬」出高山天池嘅美景。並且喺最高處,開咗一間風格獨特嘅咖啡店。

    無錯了,明眼人可能已經辨認到,呢度係一個巨大的廢棄礦場。巨大的礦坑底部由堅硬的岩石構成,日積月累的雨水以及地下水滲透,讓礦坑變成咗一個深藍色的深水湖泊。由於礦坑底部並無任何泥沙以及水生植物,所以水質非常清澈。

    係山頂咖啡店二樓觀景台可以欣賞到礦坑全貌。湖心半島可見浮潛以及漿板等水上娛樂設施,可惜入場需要另行預約,我哋只好擇日再體驗了。

    講翻咖啡店本身啦!三角形鋼結構裝修風格真係令處女座非常之安心,冷氣大廳抵禦烈日嘅頂層隔熱非常之有誠意,二樓採光採景方式獨到,就算放係任何地方呢種風格嘅咖啡店都可以單開一篇來講。無奈,風景實在太好令到咖啡和建築風格反而黯然失色。不過風景免費,飲料咖啡¥30+,良心!

    浮日藍礦咖啡呢座礦山水庫,其實仲有一個更加傳統而浪漫嘅名稱,叫做「關山肚」。這是本地人幫這個大礦坑改嘅稱呼,「肚」諧音「度」,聯想到古詩《木蘭詩》「萬裡赴戎機,關山度若飛」。意為不遠萬里找尋戰機,飛快的跨過一座座關卡和大山,似極了自駕遊的過程。

    另外,關山肚個「肚」也可以解釋為「深處」,泛指大山深處;同時「肚」又係一種形狀,形容又深又大的礦山湖,兜住咗一大潭水。無論點樣去想象,都非常之有詩意。

    無錯了,講咁多典故,我哋又要解鎖「關山肚」另一種玩法,亦係經典遊玩路線,亦係隱藏路線,探險路線。全程免費,需要一定駕駛技術,輕微徒步登山10min,有可能會踩到幾腳山泉水添。

    Step 1,又係需要打開「高德地圖」APP,搜「志高空調四會製造基地(南門)」;

    Step 2,先搵到下左圖的小路口,勉強可以開汽車通過,大膽D!

    Step 3,開車進入200米,就會見到礦山最佳觀景(上圖),然後就可以就近空地泊好部車了;

    Step 4,找到下右圖,附帶山路危險公示牌的山泉小路,大膽徒步進入!

    Step 5,步行約10min見到光禿禿的山頂,恭喜你,成功潛入山頂咖啡店!

    當然,上山良好的路況以及足夠成熟嘅半山停車場,加上景區免費,筆者並不支持大家去走探險路線(探險狂熱份子可以無視)。不過有機會再來遊玩的話,更希望可以體驗水上娛樂甚至水底浮潛。至於玩到餓了,周邊美食推薦下載「大眾點評」APP,搜附近的「農莊」。推薦本地菜色,「大盤雞」、「山坑魚」,真係可以食到現場屠宰嘅新鮮食材嘎!

  • 圖集 發現個影車勁有格蘭披治Feel嘅地方!

    圖集 發現個影車勁有格蘭披治Feel嘅地方!

    發現一個影車勁有格蘭披治Feel嘅地方!有Macau澳門格蘭披治同款賽車大樓,有格蘭披治同款金屬護欄,仲有衝線方格塗裝嘅地面,可以擺個靚Pose幫部前漆影番輯靚相添啊!

    PS:適逢遇上當地車友聚會,有大把靚車靚女,仲有好多網紅車仔攤檔。地址在文末。

    這個地方位於中國廣東省佛山市南海區「千燈湖」商圈,近年北上娛樂流行,有幸成功申請粵港澳駕駛許可的朋友可能都已經知道咧個「風水寶地」。千燈湖免費景區非常出片好行,旁邊大基綠道啱曬4+2爆單車,美食方面桑拿雞桑拿魚、冬瓜浸雞、魚生、豬雜粥等聽到流曬口水;另外附近海八路車城、快捷汽配城、粵豐汽配城以及好多工廠級「大店」順便整備車輛,快捷方便。作為預告,讀者朋友們不妨期待OptionFans Magazine為大家帶來《人車生活》欄目之「千燈湖」專題內容啦!

    Words@Alex / Photography@Alex,Mann

    地址:GOOGLE地圖廣東省佛山市南海區華翠北路大概圖中河道旁

  • 豐田默認咗3缸GR引擎嘅失敗?

    豐田默認咗3缸GR引擎嘅失敗?

    好多車迷朋友中意GR Corolla或者GR Yaris部分原因,係出於個一副可以爆發300匹馬力嘅,創新1.6T 3缸引擎。不過近排豐田集團透露,下一代嘅GR Corolla可能會放棄3缸機,而搭載2.0T 4缸引擎,動力輸出約為400匹馬力。部分原因係,需要另外設計阻尼器來解決3缸機嘅震動問題,需要顧忌運行品質、緊湊性以及成本等問題。

    不過豐田同時透露會將呢款緊湊、精緻且超高效能嘅2.0T引擎,搭載喺下一代嘅Celica甚至Supra跑車上面,咁反而對於GR Corolla車迷係個利好消息。反而,中意GR Yaris嘅粉絲群體會更看重其運動基因、輕量化以及小鋼炮風格,面對3缸機嘅運行品質等缺點必然會更加包容。不過,關於下代GR Yaris嘅動力部分,暫時未有消息,睇嚟前途渺茫。

    不過筆者認為,即使雞肋,但豐田未必會放棄3缸性能引擎條產品線。因為400匹級別嘅2.0T引擎咧條賽道,歐洲各大車廠雄踞多年,隔離本田都玩到風生水起,豐田推4缸2.0T可能只係補全產品線,人有我有咁意思。至於獨一無二嘅1.6T 3缸,先至係豐田鋼炮嘅生招牌。


    圖片均來自網絡,觀點僅代表作者個人;如果冒犯倍感抱歉,請立刻聯繫我們。

  • HONDA新V6,今次有電!

    HONDA新V6,今次有電!

    重點:

    ·本田發布新款V6引擎,承諾效率提高30%,加速能力更好。

    ·此動力系統針對專為北美市場的中大型車輛開發使用。

    ·預計2027年後,會在Pilot、Passport、Ridgeline、Odyssey上使用。

    混合動力系統的普及早已見慣不怪,即使在“排量就是正義”的美國消費市場也不例外。混合動力系統所帶來嘅“慳錢”非常實際,而且電力驅動恰好補充了中低速使用場景的尷尬,試想一下你駕駛緊一台V6 HONDA身處紅隧?相信你會感激Hybrid系統帶來嘅平順以及從容!

    HONDA嘅Hybrid其實大家都唔陌生,不錯今次HONDA推出嘅混合動力系統,主要針對中型以及大型車輛,因此配套V6引擎。

    目前可以確認,HONDA正在研發一款大型混合動力SUV,這是HONDA“更廣泛電氣化戰略”嘅一部分。這個動力系統的核心,係一款全新設計嘅V6引擎,首先就會滿足目前更為嚴格嘅排放要求,HONDA表示與目前常用的內燃機引擎車型相比,Hybrid系統會提升30%以上嘅燃油經濟性,除此之外,全油門狀態下,加速性能同樣會提升10%以上。

    從引擎外部就可以見到,此V6引擎並無常見嘅“排氣芭蕉”,採用盤頭集成式芭蕉,以提升燃油經濟性,環保性。

    HONDA方面尚未公布具體嘅動力數據,不過整個動力系統最少會有一個電機參與驅動,而四驅車型則有多大三個電機。

    預計2027年,HONDA將會在一款大型SUV上搭載新嘅動力系統,從目前現有圖片信息以及時間節點考慮,極有可能係Pilot改款車型。而未來數年時間,Honda將會係下一代Ridgeline以及美規Odyssey上陸續使用V6混合動力系統。

    圖片均來自網絡,觀點僅代表作者個人;如果冒犯倍感抱歉,請立刻聯繫我們。

  • 25年了,台JDM仲係度進化緊!

    25年了,台JDM仲係度進化緊!

    JDM Japanese domestic market。25年前,一眾日本性能車技驚四座,成就咗JDM文化嘅全盛時期,而JDM繞不開嘅話題一定有「萬轉本田」。

    S2000係最接近萬轉本田嘅車型,原廠8500轉Setting針對性升級即可突破萬轉。至於點解一定要萬轉?一方面係脫離增壓系統嘅輔助,而榨取更多引擎馬力。另一方面,高等級方程式賽車基本上都係超過萬轉嘅存在,又可以理解成只要過萬轉,就係賽車精神!當然,上萬轉把聲更勁,令人亢奮,大腦分泌多巴胺,或者先係魅力根源所在。

    問題已經過去25年了,一間25年歷史嘅改裝公司Bulletproof Automotive,利用如今最先進嘅加工技術、材料科技以及精度控制,對25年舊車S2000繼續進化,打造出一台10000轉,但係有成580匹馬力嘅猛獸,代號為BP25,即25週年紀念作品。

    動力部分BP25採用強化後的原廠2.0L排量引擎配置,搭配Vortech機械增壓,9300轉時極限壓榨出580匹馬力,電腦放轉紅線區域10000轉。波箱係同原廠一樣配置嘅6速棍波帶後輪LSD限滑差速器,Amuse鈦合金芭蕉接駁70mm雙出鈦合金排氣,主打聲靚同時輕量化。

    動力如此恐怖,但外觀部分一樣非常有來頭。BP25係今年SEMA展榮歸,並成為全場焦點之一。Spoon硬顶搭配Varis Dark Panther碳纤维闊體大包圍。避震機來自Top Secret绞牙套件,輔以J’s Racing、Roberuta、Spoon、EVS以及Hardrace等,可謂一身JDM名牌。

    BP25採用Mugen內籠,麂皮方向盘以及防滚架。多點式安全带搭 Recaro RS-G桶椅屬於賽車標準配置。ARC鈦合金旋鈕、NSX-R原車喇叭就有點小創意了,低風阻碳纖維子彈搭配鎂合金支架。

    不過外觀最犀利嘅係呢套19寸的BP-RW Evolution鍛造鈴,雖然設計靈感顯然源自日本某款鍛造鈴,不過明顯融入咗空氣動力學設計,可以降低整體風阻減少輪邊亂流。當然,我哋好難唔留意到隐藏喺裡面嘅Brembo Pista鍛造剎車系統。

    Bulletproof Automotive創始人Ben Schaffer將BP25定义為致敬S2000精神。確實,就算S2000前衛嘅外觀放眼今天仍不過時,但當年200匹出頭嘅馬力放喺今日就一定唔夠用。BP25沿用大量原廠升級部件,看似誇張其實不算傷筋動骨。如果駕駛體驗相對接近我哋日常通勤,能夠老少鹹宜咁就更加Good喇!畢竟25年前中意S2000嘅車迷朋友,現在好多都稱叔輩了吧!


    圖片均來自網絡,觀點僅代表作者個人;如果冒犯倍感抱歉,請立刻聯繫我們。

  • 廣東自駕汽車登島 手機影出水滸大俠Feels

    廣東自駕汽車登島 手機影出水滸大俠Feels

    圖:Mann 文:Alex

    本來只係想幫大家探探路,頭腦一熱兩手空空就飛車出發了,完全無帶相機只係袋咗台國產貳仟元級雜牌手機,翻來睇睇相,嘩!意外的效果不錯,於是馬上分享今次自駕遊目的地——廣東南海平沙島。(廣東自駕遊下載高德地圖App導航即可到達平沙島登島碼頭)

    想當年,香港澳門遊客來到南海呢個地方,多以拜祭名聲在外的南海觀音以及西樵大佛為自由行主線,對周邊遊玩開拓卻不多。但網傳最近幾年廣東經濟增長飽和減速,導致空氣質量不降反升,綠化面積佔比全球驚人,地域文化沉澱厚重非常宜居,個只鬆散休閒嘅旅遊Feel就真係越來越似歐洲,而且大有趕超嘅勢頭。

    下圖為平沙島登島渡輪碼頭,配套停車場,亦可以直接駕車上島。汽車駛入船艙後停放在黃色車位框內即可下車欣賞南海西樵周邊美景。

    平沙島一般可視作上完西樵山拜大佛嘅補充節目,下山自駕到平沙島碼頭即可駕車登島。地處南海西樵、九江(下圖)、鶴山(江門市)同高明(佛山市)嘅交界處,幾個地方劃河為界,周邊景點密集風景宜人,人才輩出。眾所周知黃飛鴻祖籍西樵,而詠春開派祖師爺梁贊就住系河對面嘅鶴山水鄉古勞。

    渡輪船票有幾種,全部雙程來回票,40蚊人民幣/汽車,2蚊/人,2蚊/電單車,我知道平得好過分,但平穩安全且半個鐘一班。要明白:平,一定會有平嘅理由!而圖中網紅蘆葦蕩位於島上的馬場內,上島向右手邊沿河邊大路一直駕駛幾分鐘即可途經。萬一搵唔到,可以大聲用廣東話問下和善的島民。

    東南亞海島我哋見得多了,欣賞水清沙幼嘅同時,空氣瀰漫住海水的腥味同時會有粘膩膚感。與之不同,廣東水網密佈,河流衝積平原地貌造就咗平沙島呢种河中央嘅農耕小島。島內同內陸一樣的季節性氣候,又有沙灘和波濤洶湧,還有一種海邊見唔到嘅伴水生植物——蘆葦。

    大片蘆葦蕩其實系大型嘅淡水湖泊周邊非常常見,《水滸傳》裡面會描述,梁山泊好漢藉助密集又高過人嘅蘆葦蕩伏擊高俅大軍。伴隨水質以及空氣質量的提升,大片的蘆葦蕩嘅美景又再重現係廣東水網周邊,各種落日美景圖片視頻通過自媒體迅速傳播發酵。

    平沙島非常細,環島只有20-30公里,其實個人更推薦踩單車遊玩,而且可以玩到隱藏彩蛋。雖然島上有單車甚至家庭式4輪腳踏車出租,但係騎行體驗認真麻麻,不作推薦了。4+2自帶高性能小小嘅單車環島最佳,車型不限小輪徑折疊車亦可;建議汽車不需要上渡輪,只攜帶單車登島即可。至於飲嘢食飯問題系最唔需要擔心嘅,島上咖啡、奶茶店、走地雞、河鮮,農莊遍地,基本上靠飲食支撐島民經濟。所以斷估船票便宜,最後會系飲食以及娛樂項目中賺回。

    隱藏彩蛋:無錯了,既然平沙島地處幾個地區交界,咁我可唔可以搭船過高明玩咧?係得噶!不過僅限徒步、單車或者電單車了。系平沙島碼頭背面仲有一個小型碼頭(下圖),可以直接搭船去到高明中心區。當你系平沙島騎行見到河對面有個巨大摩天輪(下圖),無錯了,對岸就係高明。搭船到對面碼頭周邊,就有高密度嘅飲食娛樂,西餐、酒吧、遊樂場。講真,唔想走了,先千零蚊一呎(上圖中的住宅),原地投資翻間千呎度假大屋都唔錯啵!

    唔講了,過緊對面高明開始下半場了。

    本文觀點僅代表作者個人;如果冒犯倍感抱歉,請立刻聯繫我們。

  • 豐田兒童接送車 解放牛馬消除繁忙時間的尷尬?

    豐田兒童接送車 解放牛馬消除繁忙時間的尷尬?

    自動駕駛熱潮已經風靡全球,好多地方都有運營試點,譬如距離我哋比較近嘅廣州南沙地區,已經向市民遊客提供自動駕駛的士,見證科幻走入生活。所以日本豐田又有新霖頭,距哋細化緊自動駕駛呢個課題,打算好切實咁解決一個生活難題——接送兒童。

    豐田推出兒童自動駕駛電車Mobi,即係兒童專屬接送車嘅概念。採用高度智能化控制,泡泡造型有車頂可以遮風擋雨,會同車內兒童有影音互動,服務於身高130cm內嘅兒童,重要嘅係允許兒童人工駕駛。豐田認為這款智能自動童車,甚至會比傳統的校巴更加安全。(聽住先啦!)

    所有已經有咗小朋友嘅上班族都會遇到嘅難題,每日要係規定時間將細路送到學校機構,然後又要係規定時間出現,接翻個細路走。接送細路,係一個每日重複而且幾乎無乜技術含量嘅工作。當然有條件可以唔去上班,或者委託傭人、長輩、親戚等,但無條件嘅家庭恐怕非常麻煩了。畢竟接送時間一定會同繁忙時間高度重疊,而且現在大城市上班族人均OT嘅情況就更加尷尬了,如果可以實在解決接送問題,咁豐田就真係為全人類立下大功。

    另外,豐田同時推出一款兒童功能性嘅玩意,四足機器人Chibibo。類似於智能機械寵物,負責陪伴監護或者幫手負載運送物品。我哋經常喺日本動漫作品中看到類似的角色,例如《高達》裡面嘅電子寵物Haro,所以非常容易可以聯想到Chibibo嘅使用場景。

    當然,我哋身邊已經有類似性質嘅產品普及而且相當成熟安全,就係兒童智能手錶啦!可以隨時監控兒童位置,可以視頻通話可以支付零用錢。但係相對大型嘅智能產品,相信家長們更關心嘅依然係安全問題。譬如機器人會唔會夾親手手腳腳,兒童電車碰撞翻側後能不能及時脫困等等。

    圖片均來自豐田官方,觀點僅代表作者個人;如果冒犯倍感抱歉,請立刻聯繫我們。

  • 萬事得全新性能部門 首款作品發佈即訂完

    萬事得全新性能部門 首款作品發佈即訂完

    幾件事,首先係MAZDA萬事得新成立嘅性能部門Spirit Racing取代了MAZDA SPEED;

    然後,今次係Spirit Racing首款車型MX-5 Spirit Racing 12R本月正式發售; 

    跟住,MX-5 Spirit Racing Roadster 12R居然只喺本地發售而且限量200台。

    發售時間短短由本月5日至20日結束。於是,一共有成9500個車迷朋友蜂擁而上報名落訂。如何從9500人當中篩走9300人而且唔好得失呢班熱心客戶,成為了萬事得嘅重點工作。不過,我哋都司空見慣日本人做生意嘅手法,有個專有名詞叫乜「飢餓營銷」!本土發售,限量200,JDM粉絲再一次自high狂歡。

    high完都係要上配置嘎!Spirit Racing首先係操控升級,搭配德國Bilstein避震機重新Setting底盤,限量版來講都非常之有誠意。動力方面由原來嘅184匹馬力,通過生死气優化、更換芭蕉同埋升級HiCam等NA強化動作,将動力壓榨至200匹马力。

    提升少?對比歐洲大廠班渦輪車,打高增壓提升三四成起步,顯然完全無可比性。2.0升自然吸氣引擎綿長嘅動力輸出方式來講,提升8%唔少了。而且改過NA引擎嘅車友都知道,駕駛體驗完全兩碼事。

    Alcantara材质嘅賽車桶椅以及4点式安全带,原廠賽車Feeling屬於200台本土限量版嘅特殊配置。當然萬事得同時都宣佈會追加2200台標準款式,譬如會采用比較舒適嘅半桶椅,迎合大部分車迷嘅實際通勤需要。

    至於定价?標準版MX-5 Spirit Racing 12R起售价为5,265,700 日元(约合 34,400 美元),限量发售 2,200 辆。更稀有嘅200台Roadster 12R則只在日本本土发售,起售价为7,612,000日元(约合49,700美元)。


    圖片來自萬事得官方,觀點僅代表作者個人;如果冒犯倍感抱歉,請立刻聯繫我們。

  • 一款可以令你放棄法拉利嘅愛快羅密歐

    一款可以令你放棄法拉利嘅愛快羅密歐

    同為義大利跑車生產廠家,法拉利一直以來都以「每個孩童的跑車夢」作為世界跑車標桿;但係老老老車迷都知道,六七十年前,同法拉利同場競技甚至壓制嘅另一個義大利跑車廠商,佢嘅名叫做「愛快羅密歐」。

    愛快羅密歐屬於小眾愛車人士心頭好,所以基於愛快經典款打造GT Super復刻系列,知名改裝公司Totem Automobili手工打造並推出咗一款限量40部嘅運動跑車GT Super Forina。用現代科技加持嘅各種性能數據,去致敬翻70年代嘅愛快跑車。

    Totem改裝製作嘅愛快跑車,江湖地位等同於Stinger操刀嘅波子911。區別於使用愛快自己嘅引擎去做復刻,Totem選擇向義大利引擎公司Italtechnica採購一款2.8升V6雙渦輪,6吼直噴(6個獨立Throttle)引擎,搭載系GT Super Forina車體內。並將這款引擎潛力全數壓榨,馬力輸出高達739匹以及800牛米嘅扭矩。

    內籠象牙白色搭配車身名為Luci del Bosco嘅金屬棕色,更顯稀有。限量40台嘅Totem GT Super Forina售價亦都相襯嘅去到53.9萬歐元,呢個價錢已經可以買一台頂級嘅法拉利了,係乜嘢理由令我放棄紅色的兒時夢想而選擇呢台經典愛快羅密歐呢?系「愛」嗎?

    圖片均來自網絡,觀點僅代表作者個人;如果冒犯倍感抱歉,請立刻聯繫我們。

  • 打唔過就加入!911 Turbo S Hybrid & 911 TT

    打唔過就加入!911 Turbo S Hybrid & 911 TT

    喺電動混合動力全球化嘅今日,以倔強著稱波子911系列終於迎來了變革。「咩話?911取消咗後置引擎!」唔可能嘅!不過確實同引擎有關,今次波子抱著「打不過就加入」嘅態度,終於將911經典水平對置6缸Turbo機電氣化,推出911 Turbo S Hybrid。

    Hybrid全球玩咗成廿年啦!使唔使咁墟撼啊?不過好多車迷都會習慣性咁認為Hybrid只係出於經濟性考量的玩意兒,今次911玩嘅Hybrid,直接上數據大家就明白了。

    Double E-Turbo

    701匹馬力(較舊款增加61匹馬力)

    800牛/米扭矩

    2.4s破96KM/H

    8.4s破200KM/H

    320KM/H極速

    車重1736KG(增加電驅動僅增重82KG)

    紐伯靈賽道成績7:03.92(較舊款快咗14秒)

    新款嘅911 Turbo S Hybrid嚴格來講算係中途改款代號992.2,不過確實係911系列首次引入Hybrid系統。照舊3.6升水平對置渦輪引擎,不過留意,渦輪係來自GTS嘅Double E-Turbo;四驅系統,原配8速DCT波箱但增加內置電機,啟用400v高壓放電平台,搭配1.9KWH電池。

    數字略顯保守,但性能提升則實在得可怕。即係,大家都咁好力,點樣發力呢?用陰力,定蠻力呢?這就是波子工程師嘅造車藝術了。

    再列舉大家睇得明嘅。992.2 Turbo S 标配前420mm後410mm陶瓷剎車碟,前轮胎規格255/35 ZR 20,后胎325/30 ZR 21。車頭可變冷卻系統,車尾可變尾翼,以及原廠就有套鈦合金死氣喉。

    至於大家最關心嘅價錢?新款911 Turbo S預計2026年春喺美国上市,硬顶版售价为270,300 USD,敞篷版則为 284,300 USD,不含税费等費用。另外,仲有一款更貴,預計命名為911 TT(Turbo Touring)嘅全新車型會搭載同樣嘅動力系統上市。屆時911TT車身上會出現致敬1973年款Carrera 2.7 RS嘅經典元素,值得期待!


    圖片均來自網絡,觀點僅代表作者個人;如果冒犯倍感抱歉,請立刻聯繫我們。

  • 自己人炒埋一碟?2025爭冠形勢突變

    自己人炒埋一碟?2025爭冠形勢突變

    2025 F1賽季又來到非常重要嘅一站,系美國德克薩斯州奧斯丁嘅美洲賽道,發生咗一些足以改變2025 F1車手WDC歸屬嘅事件。比賽前,車手總積分差距為,麥拿倫車隊皮亞斯特利(PIA)P1領跑積分榜,領先P2隊友羅禮士(NOR)22分,領先P3紅牛車隊四冠王韋斯特賓(VER)55分。但比賽之後,畫風突變!

    賽前採訪紅牛車隊顧問前F1車手馬高博士,紅牛獲得車手WDC嘅條件?馬高博士認為,只要麥拿倫兩位車手炒翻一次車,我哋就可以攞WDC!於是乎,開口即中,緊接下來的衝刺賽,兩位麥拿倫車手都出唔到T1。

    反之,VER P1起步,P1帶回,同日嘅排位賽都係P1桿位!肉眼可見的統治緊比賽。

    當然,兩位麥拿倫車手攬炒主因並不是纏鬥,而是多得阿斯頓馬田車隊嘅名將阿朗素(ALO)嘅「魚雷」行為太貪!心機PIA企圖做NOR,反向彎內行交叉線,正常嘅賽道操作放系擁擠的起步T1風險大增,無意中同ALO一齊夾咗個大大嘅三文治送給沙巴車隊嘅侯根寶(HUL)。前排起步嘅HUL帶領下遊車隊形勢一片大好從此葬送,一次過帶走三部賽車。

    而雪上加霜嘅系,PIA正賽排位賽成績不理想,P6起步,居然被兩台連續多場表現頹廢嘅法拉利擋在身前。VER、NOR兩位爭冠對手則P1、P2。

    得益美洲賽道超寬緩衝區,正賽幾乎全程有驚無險,超車唔少,但並無安全車出動。

    VER由頭帶落尾,幾乎無鏡頭,P1。

    NOR P2正常起步,但被法拉利陸克萊(LEC)行咗條超寬入彎線超過,一直等到比賽末尾先至憑藉麥拿倫賽車長距離速度優勢反超,回到P2。

    PIA就慘了,只在起步階段超過咗平治車隊嘅拿素(RUS),上升到P5直到衝線。

    好了,經此一役,2025車手WDC爭冠正式進入高潮,三人積分差進入40分內,仲有成5場比賽,以及包括兩場衝刺可以發揮。甚至積分榜P4嘅RUS,都有數字上嘅爭冠可能。

    逐個分析,NOR看似回暖拉近分差,表現其實中規中矩本來就應該有咧個水平。

    而PIA則明顯退步或者叫不適應,車迷之間傳系「木瓜規則」(麥拿倫隊內公平競爭規則)不夠公平導致心態不穩,其實都可能係麥拿倫地效賽車並不適應顛簸的美洲賽道,PIA調不出最佳狀態,就連正賽速度都每圈慢過NOR 0.3-0.4s,純粹嘅慢。

    至於VER嘅表現,固然會奪取每一個可以奪得嘅積分。不過顯然唔單只系車手風格強勢甘簡單,而從隊友P7完賽嘅狀態側面來睇,紅牛車隊以及賽車狀態貌似復甦,VER重新獲得了一部可以爭冠嘅賽車!

    另外,法拉利車隊可以提一嘴,據說法拉利高層開始介入車隊嘅運營抑制頹勢。雖然已經退出咗車手WDC競爭行列,但係法拉利P3、P4帶回,直接壓制住積分榜首嘅PIA,成功攪局影響WDC走向。或者係「國企」管理方式,法拉利仲有很多潛力未能釋放,期待2026的法拉利,更期待近期風格異常強勢嘅摩納哥人LEC嘅表現。

    圖片均來自F1車隊官方,觀點僅代表作者個人;如果冒犯倍感抱歉,請立刻聯繫我們。

  • 吾讚美吾皇 尊貴的賽車「皇帝」羅素

    吾讚美吾皇 尊貴的賽車「皇帝」羅素

    先正統、常規咁對2025 F1新加坡站作一個理解,然後再分享一些更有意思背後的故事。

    一定先恭喜平治車手羅素Pole to Win,准大滿貫(差個最快圈),讓所有車迷都相信了Toto提及的續約問題,果然真係薪金問題未傾掂數,因為羅素「更值錢」了。

    尤其喺排位賽階段,羅素可以喺Q3高壓力情況下,連續2次穩定刷出1:29.1秒嘅桿位單圈,連續2次打破世界紀錄,並2圈之間誤差精確到百分之一秒,技術同心裡都屬於頂級車手嘅表現。

    About 麥拿倫:又係老生常談,木瓜規則不公平,有人嬲嬲豬電台猛投訴,分差拉近咗3分,車迷坐等「爆雷」。

    About 法拉利:路克萊剎車過熱鬆油滑行,咸美頓最後幾圈剎車報廢,居然捱完比賽仲硬防阿朗素(阿斯頓馬田車隊),但並無鏡頭轉播?法拉利可能真係放棄2025賽季了。

    眾所周知自由集團接受管理F1運動之後,F1文化全球范圍得到極大嘅輸出。網絡作為接替電視轉播之後,F1文化喺中國範圍嘅主要傳播途徑,F1文化已經同中國網絡文化相融,於是乎就誕生咗非常有多意思的事情,譬如——賽車「皇帝」羅素。

    其實一開始羅素出圈唔係因為戰績,估計喺片頭雙手頂墻呈現大「V」嘅姿勢比較得戚,再加上羅素本身頂流顏值,於是某賽車論壇就有人用羅素做頭像,並且以皇帝的口吻去發帖、回復,進行網絡互動。久而久之,「皇帝」就成為咗羅素喺中國F1車迷圈嘅暱稱。

    登上領獎台自然「龍顏大悅」,而每次有車手同羅素發生碰撞,都會觸發「龍顏大怒」,至於今次新加坡奪冠自然就係「登基儀式」、「黃袍加身」,粉絲之間的評論充滿歡樂的空氣。

    不過撇開講笑,眾所周知平治車隊喺2026新規大改革情況下,獲得技術領先。雖然都會認為Toto親手培養嘅18歲義大利天才車手安東尼利先係平治車隊的未來,不過當下表現來講,羅素依然係平治車隊絕對的一號車手,而疊加明年平治有機會製造出火星車的話,咁「皇帝」就真係距離「登基」不遠了。

    圖片均來自F1車隊官方,觀點僅代表作者個人;如果冒犯倍感抱歉,請立刻聯繫我們。