分类： 人車生活

本來只係想幫大家探探路，頭腦一熱兩手空空就飛車出發了，完全無帶相機只係袋咗台國產貳仟元級雜牌手機，翻來睇睇相，嘩！意外的效果不錯，於是馬上分享今次自駕遊目的地——廣東南海平沙島。（廣東自駕遊下載高德地圖App導航即可到達平沙島登島碼頭）

想當年，香港澳門遊客來到南海呢個地方，多以拜祭名聲在外的南海觀音以及西樵大佛為自由行主線，對周邊遊玩開拓卻不多。但網傳最近幾年廣東經濟增長飽和減速，導致空氣質量不降反升，綠化面積佔比全球驚人，地域文化沉澱厚重非常宜居，個只鬆散休閒嘅旅遊Feel就真係越來越似歐洲，而且大有趕超嘅勢頭。

下圖為平沙島登島渡輪碼頭，配套停車場，亦可以直接駕車上島。汽車駛入船艙後停放在黃色車位框內即可下車欣賞南海西樵周邊美景。

平沙島一般可視作上完西樵山拜大佛嘅補充節目，下山自駕到平沙島碼頭即可駕車登島。地處南海西樵、九江（下圖）、鶴山（江門市）同高明（佛山市）嘅交界處，幾個地方劃河為界，周邊景點密集風景宜人，人才輩出。眾所周知黃飛鴻祖籍西樵，而詠春開派祖師爺梁贊就住系河對面嘅鶴山水鄉古勞。

渡輪船票有幾種，全部雙程來回票，40蚊人民幣/汽車，2蚊/人，2蚊/電單車，我知道平得好過分，但平穩安全且半個鐘一班。要明白：平，一定會有平嘅理由！而圖中網紅蘆葦蕩位於島上的馬場內，上島向右手邊沿河邊大路一直駕駛幾分鐘即可途經。萬一搵唔到，可以大聲用廣東話問下和善的島民。

東南亞海島我哋見得多了，欣賞水清沙幼嘅同時，空氣瀰漫住海水的腥味同時會有粘膩膚感。與之不同，廣東水網密佈，河流衝積平原地貌造就咗平沙島呢种河中央嘅農耕小島。島內同內陸一樣的季節性氣候，又有沙灘和波濤洶湧，還有一種海邊見唔到嘅伴水生植物——蘆葦。

大片蘆葦蕩其實系大型嘅淡水湖泊周邊非常常見，《水滸傳》裡面會描述，梁山泊好漢藉助密集又高過人嘅蘆葦蕩伏擊高俅大軍。伴隨水質以及空氣質量的提升，大片的蘆葦蕩嘅美景又再重現係廣東水網周邊，各種落日美景圖片視頻通過自媒體迅速傳播發酵。

平沙島非常細，環島只有20-30公里，其實個人更推薦踩單車遊玩，而且可以玩到隱藏彩蛋。雖然島上有單車甚至家庭式4輪腳踏車出租，但係騎行體驗認真麻麻，不作推薦了。4+2自帶高性能小小嘅單車環島最佳，車型不限小輪徑折疊車亦可；建議汽車不需要上渡輪，只攜帶單車登島即可。至於飲嘢食飯問題系最唔需要擔心嘅，島上咖啡、奶茶店、走地雞、河鮮，農莊遍地，基本上靠飲食支撐島民經濟。所以斷估船票便宜，最後會系飲食以及娛樂項目中賺回。

隱藏彩蛋：無錯了，既然平沙島地處幾個地區交界，咁我可唔可以搭船過高明玩咧？係得噶！不過僅限徒步、單車或者電單車了。系平沙島碼頭背面仲有一個小型碼頭（下圖），可以直接搭船去到高明中心區。當你系平沙島騎行見到河對面有個巨大摩天輪（下圖），無錯了，對岸就係高明。搭船到對面碼頭周邊，就有高密度嘅飲食娛樂，西餐、酒吧、遊樂場。講真，唔想走了，先千零蚊一呎（上圖中的住宅），原地投資翻間千呎度假大屋都唔錯啵！

唔講了，過緊對面高明開始下半場了。

本文觀點僅代表作者個人；如果冒犯倍感抱歉，請立刻聯繫我們。

颱風「樺加沙」前的週末，閒來無事識埋D九唔搭八嘅車友，話帶我去順德睇一個好特別嘅車展。我心霖「發達啦今次！順德喔，肯定係美食主題車展！逛吃逛吃！」一開始仲幾正常，停車場低趴聚會，飄移表演，門口各種攤販賣零食。啊，點知……你自己睇圖啦！

當我發現Show Car隔離個價目表，係講緊一百幾十蚊一部車嘅時候，一切已經太遲了。無錯，今次車展嘅主題就係模型、遙控車、玩具、紀念品周邊等等！就連部初代GTR Show Car都係有各種比例縮小嘅模型賣緊。

今次中國人揚眉吐氣！比美高模型嘅展台大大張海報影住中國車手葉一飛，登頂利曼24小時耐力賽冠軍。法拉利授權嘅葉一飛同款戰車都係講緊幾十蚊人仔起。

正片開始之前，放几張國產玩具廠商嘅火車模型先，其實都幾有英國汽車博物館Feel嘎，現場買展會限定款嘅遊客排曬長龍。

今次參展嘅大部分都係玩具展商，而且大多數好有誠意咁係帶佈景咁展出俾我哋睇嘎。現場好多模型車都係有主題咁出現，除了單一車型各種花款，譬如平成年代JDM主題、007主題。

同埋今個車展，遙控車都係好重要嘅一個項目。最有趣嘅係大部分展示會攞埋帶有佈景嘅賽道出來，比大家試玩遙控車。山路飄移主題、檯球爭霸賽主題，都非常有趣。部分賽道都係可以售賣嘎！

講明車展，肯定唔會全部都係玩具車啦！一定有大家中意睇嘅……改裝車、越野車、老爺車、JDM、電影Show Car等等啦！以及本地網紅、車手都會有粉絲見面簽售會。

筆者勁中意嘅四眼仔蓮花Exige小跑車。蓮花品牌目前歸屬中國吉利汽車集團，所以新款基本電氣化，輕量化燃油小跑車就買少見少了。

三菱Delica有一期興起咗改成硬派越野車咁玩，不過就咁玩下個越野樣，出街賣下周邊小商品，或許更加適合。

至於電影或遊戲Show Car一定係一個相對門檻比較低嘅展示類別，有無人幫手辨認下圖中嘅小姐姐來自邊個作品呢？當然，變形金剛、狂野極速全家福、頭文字D、灣岸Mid-Night、憨豆先生等等影視主題，都有出現。

另一個令筆者感興趣嘅一定係老爺車呢Part，同影視作品相關嘅老爺車更加容易穩到共鳴，每一款車之所以經典，背後一定會有個故事。

雖然平治AMG GT性能無敵，但係居然取消咗鷗翼門！所以筆者會更中意前代平治SLS系列。不過老爺車，亦都算係玩具車嘅一種啦！畢竟企係日常使用便利性來講，完全無法同新款車相提並論。今次車展，仲有好多介乎於玩具同車輛之間嘅產物，譬如Mini Bike以及爆改電動踏板車。

車展都幾大下，佔用咗順德潭州會展中心嘅其中4個館。作為車展來講規模尚可，但係作為玩具車展來睇，絕對算得上亞洲頂流嘅存在了。行到餓餓地添，既然地處美食之都大順德，我又要點開「大眾點評」APP，篩選10Km範圍內的順德美食了。

自從港府大陸之間，開放咗廣東自駕回鄉之後，真係非常利好中意自駕遊嘅車友。當然啦，雖然自駕遊範圍僅限廣東地區，不過今次對於廣東地區千篇一律的亞熱帶「綠色」風情，我哋亦可以睇到不一樣嘅風景地貌。

自駕遊直達，進入廣東之後下載一個「高德地圖」導航APP，然後搜「浮日藍礦咖啡」，開啟今次自駕啦！

根據導航帶路，順利的話三個鐘車程，我哋會去到佛山和肇慶嘅交界處——一個群山環繞但係光禿禿嘅地方。如果客流量巨大，可以考慮提前停車係半山停車場，然後一小段階梯拾級而上就會到達目的地。體能零要求，無需任何裝備，注意防雨防曬即可。

歐洲最靚嘅景點，一定走唔甩阿爾卑斯山；中國最出名美景，一定會有西藏深處神秘而美麗嘅「日照金山」。而兩者共通之處，就係都會有高山寒帶寸草不生嘅禿石峰頂，尼樣嘢係地處亞熱帶兼並無高海拔山峰嘅廣東，實在不敢想象。

但係充滿想象力嘅廣東人，就係可以喺亞熱帶平原，「模擬」出高山天池嘅美景。並且喺最高處，開咗一間風格獨特嘅咖啡店。

無錯了，明眼人可能已經辨認到，呢度係一個巨大的廢棄礦場。巨大的礦坑底部由堅硬的岩石構成，日積月累的雨水以及地下水滲透，讓礦坑變成咗一個深藍色的深水湖泊。由於礦坑底部並無任何泥沙以及水生植物，所以水質非常清澈。

係山頂咖啡店二樓觀景台可以欣賞到礦坑全貌。湖心半島可見浮潛以及漿板等水上娛樂設施，可惜入場需要另行預約，我哋只好擇日再體驗了。

講翻咖啡店本身啦！三角形鋼結構裝修風格真係令處女座非常之安心，冷氣大廳抵禦烈日嘅頂層隔熱非常之有誠意，二樓採光採景方式獨到，就算放係任何地方呢種風格嘅咖啡店都可以單開一篇來講。無奈，風景實在太好令到咖啡和建築風格反而黯然失色。不過風景免費，飲料咖啡¥30+，良心！

浮日藍礦咖啡呢座礦山水庫，其實仲有一個更加傳統而浪漫嘅名稱，叫做「關山肚」。這是本地人幫這個大礦坑改嘅稱呼，「肚」諧音「度」，聯想到古詩《木蘭詩》「萬裡赴戎機，關山度若飛」。意為不遠萬里找尋戰機，飛快的跨過一座座關卡和大山，似極了自駕遊的過程。

另外，關山肚個「肚」也可以解釋為「深處」，泛指大山深處；同時「肚」又係一種形狀，形容又深又大的礦山湖，兜住咗一大潭水。無論點樣去想象，都非常之有詩意。

無錯了，講咁多典故，我哋又要解鎖「關山肚」另一種玩法，亦係經典遊玩路線，亦係隱藏路線，探險路線。全程免費，需要一定駕駛技術，輕微徒步登山10min，有可能會踩到幾腳山泉水添。

Step 1，又係需要打開「高德地圖」APP，搜「志高空調四會製造基地（南門）」；

Step 2，先搵到下左圖的小路口，勉強可以開汽車通過，大膽D！

Step 3，開車進入200米，就會見到礦山最佳觀景（上圖），然後就可以就近空地泊好部車了；

Step 4，找到下右圖，附帶山路危險公示牌的山泉小路，大膽徒步進入！

Step 5，步行約10min見到光禿禿的山頂，恭喜你，成功潛入山頂咖啡店！

當然，上山良好的路況以及足夠成熟嘅半山停車場，加上景區免費，筆者並不支持大家去走探險路線（探險狂熱份子可以無視）。不過有機會再來遊玩的話，更希望可以體驗水上娛樂甚至水底浮潛。至於玩到餓了，周邊美食推薦下載「大眾點評」APP，搜附近的「農莊」。推薦本地菜色，「大盤雞」、「山坑魚」，真係可以食到現場屠宰嘅新鮮食材嘎！