標籤: sti

  • 棍波長存！掃把佬確認推出三款棍波新車！

    棍波長存！掃把佬確認推出三款棍波新車！

    係早前嘅日本超級耐久賽事上面，掃把佬方面確認2027年內推出三款新嘅棍波新車。其中包括WRX、BRZ以及一款全新嘅Hatback車型。其中掃把佬方面更表示「三款車型將會交由新成立嘅運動車型企劃室負責開發設計，結合賽車運動所積累嘅技術以及新知識，務求駕駛更加愉快及容易」。

    目前可以確認細節係，WRX將會搭載更高強度嘅STi波箱TY85型號，BRZ完整版本以及一台五門Hatchback。

    其中最令不少車迷期待嘅當然就係新款五门Hatchback，只因掃把佬方面曾係2025年日本移動展覽上推出過一款Performance-B STi概念车，引發咗無數車迷嘅遐想，普遍都認為新款五门Hatchback將會係「現款WRX嘅Hatback版本」。不過掃把佬嘅首席技術官、兼任副總裁嘅藤貫哲郎先生表示「新款嘅Hatback棍波定位係一台人人都開得起嘅基礎車型，開發初心係為咗熱愛汽車嘅工程師利用現有技術以及材料實現想法」，顯然，掃把佬方面並無將此車定位到WRX或者STi嘅高定位上面，反而是更接近日常使用嘅車型。同時暗示著會係一款融合咗低調嘅Impreza Hatchback和WRX元素嘅車型。

    相比此前發佈嘅概念車型，顯然外型上會更為簡約低調。
    筆者並不認為目前掃把佬方面會推出Hatchback版本嘅STi，最多都係比少少「STi風味」你試試。

    作為一個資深嘅掃把佬車迷，始終認為Hatback並非WRX或者STi嘅正統，當年俗稱「十代」嘅STi都引發咗唔少爭議，後續再推出翻傳統嘅Seden款式。因此掃把佬方面對新車會作出如此定位係意料當中。而且目前市面上嘅其他棍波運動車型，其實普遍已經進入咗一個較高價位嘅區間，入門定位嘅棍波車型確實少。所以，掃把佬方面哩款Hatback，動力方面未必會有WRX嘅水平，但會係一個全新嘅入門選擇。

    至於WRX方面，新車將會搭載「TY85」嘅6速棍波波箱，从WRX STI「GD」世代开始服役至「VA」世代，以高耐久性、優秀換檔手感以及承受高扭力而聞名，雖然同目前WRX上使用嘅「TY75」有不少雷同之處，不過強度上確實相差甚遠。因此面對大幅度動力升級以及長時間嘅賽道路況，「TY85」更能勝任。不過STi身上嘅「DCCD」四驅系統是否會同步上車不得而知，因為掃把佬方面始終未曾發布真正嘅STi車型。

    VB世代嘅WRX，目前尚未出現正身STi

    而「C位」嘅BRZ，據聞將會以舊年發佈嘅BRZ STi Sport Type RA為基礎，繼續係空氣動力以及輕量化上作出優化，原本嘅「TL70」波箱都會有機會換裝「TY85」波箱。至於動力方面，似乎唔會有太大變化，畢竟BRZ哩類車型，輕量化，整體調教嘅變化，往往會比增加幾十匹馬力更直接有效。

    所以明顯三款車型對應嘅係三個唔同市場嘅消費者。時至今日，可能會有唔少人會覺得點解棍波車依然有唔少忠實擁躉，如果單純從所謂嘅情懷角度介紹，未免過於生硬。筆者始終認為，棍波嘅存在係可以令駕駛者可以直接參與到動力嘅輸出管理，唔同嘅狀態下，需要用邊個檔位，降檔補油等操作都會直接影響到車身動態，係唔需要非常快嘅情況下，就已經獲得更多嘅駕駛參與感。所以筆者認為，反正都係要自己開心，咁點解唔買部自己覺得好玩滴嘅？

    圖片均來自網絡，觀點僅代表作者個人；如果冒犯倍感抱歉，請立刻聯繫我們。

  • 激烈駕駛左揈右揈，擔心引擎狀態點算好？

    激烈駕駛左揈右揈，擔心引擎狀態點算好？

    無論你係SMD嘅愛好者，又或者係賽車場嘅忠實Fans，都會清楚一點，就係你需要同G-Force作對抗。Full throttle，重Brake，高低速過彎，都會產生唔少嘅G-Force，而其實除左係你車體本身、駕駛員本身對抗緊之外。實際上係你車內，所有嘅液體都係受其影響。所以有唔少朋友，週末過去賽車場打算開心下，發現點解明明做好準備，結果引擎最後都出現可怕嘅「異響」？

    其實就係因為原厂油底殼通常都比較開闊，油底殼內嘅偈油系G-Force作用下，偈油匯集到油底殼內嘅一側，遠離偈油泵，此時偈油可能會吸入空氣而不是偈油，直接導致機油壓力驟降，從而引發引擎內嘅潤滑不足，首先會受影響嘅自然就係大細牙，繼而引發其他嚴重故障。如果車手本身鐘意使用「拖波」嘅手法，咁潤滑問題會更為嚴重。

    因此，油底殼擋板就係一個相當唔錯嘅「補品」，可以有效防止偈油過多傾側到一邊，保持吸油嘴附近有足量偈油。作為典型例子，Subaru嘅水平對置引擎就係特別需要留意吸油問題。而近年最標誌性莫過於用於GR86同BRZ嘎FA24引擎。大量玩家係賽道上進行長時間的激烈”掟”彎時，受G-Force影響，偈油會積聚在油底殼特定側，加上正時鏈條外蓋的設計，導致回流油底殼不順，油壓下降。

    Greddy推出嘅哩款油底殼擋板係單層設計，金屬板上開有多個油槽，有效減少偈油往上飛濺，並快速回落到油底殼內。

    而另外一個常見嘅牌子就係TOMEI，TOMEI嘅擋板採用雙層設計，上下兩層通過焊接固定，上下雙層設計可以進一步將偈油控制係油底殼內，並減少油液本身嘅翻滾現象。不過安裝需要通過油底殼進行壓緊，日後如果需要拆油底殼進行RTV清除時，要小心分離油底殼體，避免擋板變形。

    FA24引擎係原廠組裝時，由於打上了過多的密封膠（RTV 膠）。多餘的膠條會在日常使用的情況下，容易脫落並聚集在油底殼內，因此會被吸入油嘴內，由於FA24濾網係位於油嘴內部，因此非常容易堵塞濾網，進而影響機油泵吸油嘅效率。

    因此，除左較為常規嘅油底殼擋板之外，DAIANDONG係原廠吸油嘴嘅外部安裝上一個外置濾網。你會見到密集嘅多面開窿設計，增大左有效嘅吸油面積，即時有密封膠積聚係油底殼內都可以保證吸油嘴正常吸油，避免原廠吸油嘴內部堵塞，後續拆油底殼清理RTV時也更為方便。

    SYMS推出嘅哩個Kit，將整個油底殼內部重新設計調整，並非單純一個擋板部件。油底殼整體與原廠殼體一致，不過明顯可以見到SYMS將其中一層擋板直接加裝焊接係油底殼內部，另外一層結構則需要另外安裝在引擎下方。另外哩套Kit曾獲批在2022 年 GR86/BRZ Cup系列賽事當中使用，因此受到唔少用戶追捧。

    當然，除左哩類型簡單嘅產品之外，更高階嘅玩法當然就係Dry Sum System（干式油底殼）嘅做法，通過獨立嘅偈油儲存壺以及加大嘅偈油泵，可以保證全天候穩定嘅油壓，不過施工難度以及費用自然水漲船高，有機會再同大家介紹。

    圖片均來自網絡，觀點僅代表作者個人；如果冒犯倍感抱歉，請立刻聯繫我們。