Donkervoort推出了新款P24 RS，並宣稱系「有史以來最荷蘭嘅超級跑車」，既然如此，咁筆者就大膽猜測佢會系週末時間著住橙色衫然後大唱「DU DU DU DU, MAX VERSTAPPEN」，Donkervoort方面宣稱，P24 RS機械屬性濃烈，是對「電子化，同質化汽車嘅直接反擊」。
外觀上，顯而易見地有大量裸露嘅碳纖維材質，鬼面罩型態上非常似一隻大嘴昆蟲，整車有非常濃烈嘅科技感。可能會有車迷會認為系一款科技化嘅新車，但實際上Donkervoort P24 RS系一台名副其實嘅「復古」車型。因為P24 RS採用了傳統嘅FMR佈局，所有動力輸出都通過5前速手動波箱輸出到後輪，甚至連Power Steering同ABS系統都係選配！
P24 RS嘅動力核心，系來自福特嘅3.5公升EcoBoost V6引擎，並且已經進行咗改裝，首先系腹內活塞連桿等更換為鍛造零件，配置乾式油底殼潤滑系統，排氣芭蕉更加採用咗3D打印工藝，搭配荷蘭Vander Lee公司嘅兩隻大渦輪，最終輸出馬力設定系600匹。似乎數據上並唔算非常出彩，不過要記住，P24 RS車重僅僅780kg，手波純正後驅車，車手Hold得住先算啦！
筆者認為，P24RS前輪採用咗開放輪組嘅設計，有非常濃烈嘅古典賽車味道，又與當年Plymouth Prowler有異曲同工嘅感覺，再加上碳纖維Targa車頂設計，開出街你唔想俾人留意都幾有難度。
產量方面，P24 RS僅生產150台，都係純手工打造，即使售價高達 298,500 歐元，其中50台已經售出至歐洲，美國，中東等地區嘅狂熱車迷，睇落真係買要趁早。
圖片均來自網絡，觀點僅代表作者個人；如果冒犯倍感抱歉，請立刻聯繫我們。