過去幾十年，打開頭冚抽出偈油尺，係好多車主最基本嘅檢查動作，好簡單就可以睇到引擎油液夠唔夠。不過而家愈來愈多新車已經取消咗實體偈油尺，想睇油位，要入儀表或者車機入面幾層menu先睇到。對於鍾意自己郁手整車嘅車迷，呢個改變好似係倒退，但廠商咁做其實有佢哋嘅諗法，唔少DIY車迷知道背後原因之後，都有好多唔同講法。
早喺2024年，Automotive News就直接問過各大車廠，點解要取消偈油尺。當時Stellantis嘅發言人Dale Jewett就話，而家大部份車主根本唔會自己檢查偈油，有感應器就唔同，每次撻車就會自動話你知偈油位，呢個設計係就住一般用家嘅習慣去諗。平治美國方面都有類似講法，佢哋覺得用電子方式監測偈油位，車主睇儀表就清楚，一旦偈油唔夠或者太多，就會彈提示，減低整壞引擎嘅風險。廠方仲有一個重點，就係好多普通車主，其實都唔識正確睇偈油尺。
講返實體偈油尺，其實都唔一定準。唔同車款嘅偈油尺標記設計各有各樣，有刻線、有彎位，Min同Max啲字又細，有啲淨係靠膠頭嗰段做參考。架車唔泊平、引擎未去到正常工作溫度，又或者抽偈油尺出嚟嘅角度唔對，都會睇錯數。好多車主就算想自己檢查，都有機會睇錯。好似平治所講，用電子感應去測就可以避免人為操作出錯，唔使靠經驗去估偈油位。Consumer Reports負責測試嘅Michael Crossen就補充另一個問題：就算車主見到偈油少咗，自己加嘅時候都有機會落多咗；再加而家新引擎對偈油規格好嚴格，廠方又唔想車主隨便倒支唔夾嘅偈油落去，搞到後續壞車。除咗用家容易整錯之外，仲有安全同生意上嘅考量。而家混能車愈出愈多，引擎艙入面有高壓電零件，廠方唔想普通車主周不時開頭冚周圍撥，唔小心掂到高壓電就好危險。
另外就係成本問題，架車已經有螢幕同感應器，靠軟件就讀到偈油位，就唔使再整偈油尺同相關零件，慳返少少物料錢。不過呢個做法，都令好多鍾意自己整車嘅車主覺得唔方便。以前泊低車，抽偈油尺出嚟幾秒就check完；而家要撳幾層車機先搵到個數，萬一個感應器壞埋，就連最基本嘅油位都冇辦法手動核實。好多老車迷同DIY玩家都有疑問，電子感應始終都有壞嘅一日，實體偈油尺就係最簡單、最穩陣嘅後備方案。一班習慣舊式保養方式嘅車主最擔心，將來會唔會有愈來愈多車，將好多基礎檢查都收晒入電子系統，車主自己可以郁手嘅地方愈來愈少，呢個都係車壇而家一直熱議嘅話題。
圖片均來自網絡，觀點僅代表作者個人；如果冒犯倍感抱歉，請立刻聯繫我們。