講起六七十年代嘅美式肌肉車，大家腦海除咗大馬力 V8 引擎、機蓋進氣口同誇張車身拉花之外，好多 Fastback 快背車嘅後窗上面，都會見到一組橫向百葉擋板，亦即車迷所講嘅 Window Louvers。好似 1969 年 Ford Mustang Boss 302、第二代 Chevy Camaro 都經常見到呢個配置，好多人以為只係純粹外觀改件，但追溯翻當年背景，呢套百葉背後其實有實際功能考量，唔少老車迷得知哩段歷史之後都恍然大悟。
呢一組百葉一般由金屬或者塑膠橫板組成，透過支架直接固定喺後窗玻璃之上，唔會替換原有玻璃。雖然 Notchback 轎跑都有機會見到，但絕大多數都係安裝喺 Fastback 快背車身上，呢個並非巧合。六零年代後期 Fastback 車型大行其道，傾斜角度好大嘅大面積後窗，係太陽直射之下，會令車廂溫度急劇上升。喺嗰個年代，汽車冷氣仲係非常昂貴嘅選配，車窗貼膜技術亦都尚未成熟，大部份車主都冇辦法透過原廠設備抵擋猛烈陽光，百葉就成為咗當時一個實用解決方案。
原理同屋企窗戶嘅百葉簾相近，唔會完全遮擋光線，但可以大幅削弱陽光直接照射入車廂，降低車內溫度，同時亦都提升車內嘅私隱度。當然唔可以否認，視覺效果先係令呢件配件爆紅嘅關鍵，黑色橫條百葉令肌肉車尾部線條更加壓抑硬朗，充滿粗獷嘅性能味道，就算到今日，都係經典老車改裝嘅熱門元素。不過事物永遠有兩面，百葉亦都會阻礙後方視野，有唔少老車迷回憶，當年行車經常會被前方車輛後窗嘅陽光反射晃眼，安裝百葉之後，呢個困擾就可以得到舒緩。
早喺四十年代嘅 Buick Roadmaster，就已經將衝壓金屬百葉用於車身散熱。但真正令外置後窗百葉聲名大噪嘅，就要數 1966 年日內瓦車展登場嘅 Lamborghini Miura。初期 Miura 中置 V12 引擎上方係一塊有機玻璃透明蓋，工程師很快發現，350 匹 V12 運作產生嘅高熱會被玻璃封死，熱量難以散走。設計師 Marcello Gandini 就將透明蓋替換成百葉結構，用嚟輔助引擎艙散熱，呢個設計亦都成為 Miura 最標誌性嘅特徵。
意大利超跑嘅設計很快就傳到美國車壇。Ford 早喺 1965 年 Mustang 嘅三角窗就已經用過固定式金屬百葉，去到 1969 年，就為 SportRoof 快背版 Mustang 提供名為「Sports Slats」嘅原廠後窗百葉選件。一年之後，Chrysler 亦都為 Dodge Challenger 同 Plymouth Barracuda 推出原廠百葉套件，美系車廠嘅方案同 Miura 唔同，佢哋用鋁合金百葉直接鋪喺原有後窗之上，唔會取代玻璃本體。
踏入七十年代中期，美國售後改裝市場開始大量販售通用百葉套件，唔再局限於美系肌肉車，好似 Datsun 280Z、Mazda RX‑7 呢一啲日系雙門跑車，都成為百葉改裝嘅常客，不少套件仲會一併提供三角窗百葉。呢股風潮一路延續到八十年代，不過九十年代開始，隨住車窗貼膜技術普及，加上講求流線型嘅新世代設計風格興起，百葉就慢慢淡出主流市場。
不過經典設計從來唔會真正消失，近年百葉又再度復活。Lamborghini 嘅 Temerario 同 Revuelto 新世代超跑，仍然會向 Miura 嘅百葉設計取經；Chevrolet C8 Corvette ZR1 亦都使用類似百葉元素；就算係現代量產車，由 Toyota GR86 到 BMW 4 Series，改裝市場都仍然有大量對應嘅百葉套件可供選購。回望成段發展，百葉由解決散熱隔熱嘅實用部件，演變成代表六七十年代性能車嘅文化符號。只不過對於一班親身經歷嗰個年代嘅車迷更為緊要嘅係，呢啲橫向擋板，承載嘅唔止係外觀，亦都係舊汽車工業技術尚未完備之下，廠商同改裝圈搵出來嘅一套權宜解法。
圖片均來自網絡，觀點僅代表作者個人；如果冒犯倍感抱歉，請立刻聯繫我們。