有時車廠有好多極具遠見嘅構思，其實都係生不逢時。例如當年嘅 Audi A2，好多車友都會記得呢部 90 年代末嘅神級小車。當年 Audi 廠商大膽採用 ASF 全鋁車體，做到輕量、低風阻同極佳油耗，成個放到今日都仍然好先進。奈何當年市場未準備好，高昂造價令銷情慘淡，最後黯然落場。
不過，時隔二十幾年，Audi 正式將 A2 呢個經典車名復活，新車定名A2 e‑tron，搖身一變成為緊湊型電動 Crossover，將初代 A2 講求高效、實用嘅核心精神，搬入電動新世代，今次終於踩中市場嘅時間點。新車外觀保留初代 A2 嘅靈魂，方正高身車體、車尾嘅分體式雙層玻璃尾窗，都係向舊作致敬。不過就唔再係細部嘅hatch，車身變得更闊，輪拱更飽滿，整體係四平八穩嘅 Crossover 姿態。雖然繼承復古元素，但全套係 Audi 最新電動車設計語言、幼細燈組同空力輪圈。
呢部車最大賣點，就係空氣動力同能耗表現。廠方話 A2 e‑tron 係品牌有史以來效率最高嘅量產車，風阻係數低至 0.24Cd，比當年嘅鋁製 A2 再進一步。為咗壓低風阻，底盤做全封閉處理、有可調節主動散熱進氣口、輪拱周邊加入導流部件，連門把手都用上感應式翼型電動把手，輕輕一拉就會電動彈開，當然設有後備電源，唔怕電子系統失靈開唔到門。
WLTP 測試底下，大電池版本每百公里能耗低至 12.8kWh，三組電池規格分別係 52kWh、61kWh 同 84kWh，對應唔同使用場景。
- 52kWh 入門版：單後驅馬力 168PS，0‑100km/h 8.8 秒，WLTP 續航 422km，英國開售價由 32200 英鎊起
- 61kWh 版本：馬力 190PS，加速 7.9 秒，續航 515km
- 84kWh 大電池版本：最高可選 326PS 旗艦設定，0‑100km/h 只需 5.7 秒，WLTP 最大續航 645km，極速可以去到 200km/h，其餘版本就會被限制喺 160km/h。
值得留意，新車基於 MEB 平台開發，全系後驅，唔提供 Quattro 四驅版本。快充方面，84kWh 大電池最高支援 183kW 直流快充，由 10% 充到 80% 需要 29 分鐘；細電池版本快充功率得 100kW，但因為電池容量細，充電時間反而縮短到 24 分鐘。同其他 VW 集團 MEB 電車一樣，支援雙向充電功能，可以反輸電俾家用電器。
入到車廂，就見到 Audi 全新座艙佈局，11.9 吋儀表屏幕加上 12.8 吋曲面中控觸控屏，撥波桿移到轉向柱側面，釋放咗中控台大量空間。中控台設有 Qi 2.2 雙位無線冷卻充電板，可以同時俾兩部手機充電。
最特別就係首次喺量產車登場嘅Fidlock 磁扣模組系統，透過磁石加機械鎖扣，杯架、雜物袋等配件可以直接扣喺車廂同尾廂嘅指定位置，彎道急駛都唔會周圍碌，靈活度相當高，日後呢套技術都有機會下放至其他 Audi 車型。實用性方面，軸距同 Q4 e‑tron 一樣係 2770mm，前後座腿部空間有保證。不過尾廂得 396 公升，比自家 Q4 e‑tron 嘅 520 公升細，輸俾 Renault Megane E‑Tech 嘅 440 公升，但就略勝 VW ID.3 同 Volvo EX30。另外仲設有前備廂 Frunk，增加擺放充電線嘅空間。
同初代 A2 不惜工本全鋁車身唔同，今次 A2 e‑tron 主要用鋼材，局部加入鋁合金部件，控制造車成本。好有趣嘅係，由草圖到正式亮相，成個開發週期只係 21 個月，速度相當驚人。不過要留意，新車暫時主攻歐洲市場，美國市場就唔會導入，香港會唔會引入目前亦都未有消息。回顧歷史，初代 A2 理念完全行得太前，先進技術換來高昂售價，當年消費者唔願意買單。而家歐洲電動車市場成熟，消費者重視能耗同空間靈活性，A2 e‑tron 終於等到屬於自己嘅時代。
不過目前網上都出現唔少爭議聲音：有車友覺得新車失去舊 A2 獨特嘅簡約氣質，內裝質感似 VW 多過 Audi；亦都有人覺得入門版馬力一般，售價唔算平。但無可否認，佢繼承咗舊 A2嘅核心，將低能耗、高實用性擺喺第一位。究竟呢部遲咗四分之一個世紀先出現嘅繼承者，可唔可以扭轉初代 A2 嘅命運，就要睇歐洲市場嘅反應。同時，筆者就好希望呢款車可以進入到香港市場了。
圖片均來自網絡，觀點僅代表作者個人；如果冒犯倍感抱歉，請立刻聯繫我們。