Type R對於Honda車自然係一個重要而且特殊嘅存在，他的運動性能大家有目共睹，而且係本港嘅保有量，真係足夠誇張。不過今時今日如果你有機會去選擇一台「R」車，你會選擇邊一架？可能對於筆者來講，會係以下哩款「Euro R CL7」。可能已經會有唔少「鍵盤車神」開始心急「哩啲點係正宗R車啊，哩啲一啲都唔夠RAW」。而且係不如，先認真去解讀一下哩架車？
從車型上劃分CL7隸屬於7代Accord，係一台正經嘅行政風格定位嘅房車，外表西裝骨骨，不過內裏其實有好多Muscle。係2002年嘅時候，由於前代Euro R（CL1/CH1）嘅大受歡迎，Euro R CL7就直接作為第七代Accord嘅最高階型號出售，不過有趣嘅係，本代僅在日本發售，歐洲方面並無車型更新，所以CL7係一台非常正宗嘅JDM車。但筆者從多次駕駛經驗上得出一個感受，就係CL7有一種唔屬於Honda 「R」車嘅厚重感、高級感。
首當其衝嘅係動力方面，CL7採用嘅係大家都好熟悉嘅K20A引擎。不過哩份K20A會比FD2上個多咗一份平衡軸，而有平衡軸嘅存在自然就會消耗相當一部分高轉嘅暴力感，沒錯，CL7嘅高轉表現的確會比Type R上嘅K20A差少少，不過4000轉打後原本四缸引擎應該會出現嘅次級震動, 就消失得無影無蹤，再加上液壓機腳配合，三個字來形容就係「高級感」。而且同常見嘅K20唔一樣，CL7上面嘅整體搭配，會有一種低扭非常充沛嘅體感，並無常見K20A係低轉速區間嘅慵懶感覺。所以日常市區行駛，可以講得上有驚喜。另外，如果係玩車嘅前輩，都應該記得當年Accord係香港嘅宣傳重點就係「風油軚」，一隻手指就可以撩到方向。所以毫不意外地，CL7雖然作為一台「R」車，軚盤可以用輕手去形容，電子助力軚尺，功不可沒。不過其實CL7嘅軚感，並沒有如同坊間傳說咁不堪，反而有一種乾淨嘅手感。
改裝頭蕉似乎已經成為咗Honda玩家嘅「共識」，不論4出1還是4出2出1結構，都各有輸出特色，就睇自己喜歡邊種特性了，車主就選擇了坊間俗稱「蕉王」嘅421結構頭蕉。
內籠方面，筆者認為CL7係舊時代Honda車裡面, 唯一一台有隔音嘅「R」車，因為相比其他紙皮盒仔，CL7日常駕駛嘅靜謐「音密」性其實相當唔錯，絕對對得住房車哩個定位。其實原車內籠最有戰鬥氣息嘅，就一定係紅色表玉同埋一對Recaro嘅運動座椅，其餘內籠設計都係當年同類「行政車」嘅風格。時至今日，正常使用嘅CL7，內籠狀態都相當唔錯，並沒出現表檯分解破碎嘅現象。
排氣方面，除咗頭蕉之外，少不了仲有一套中至尾，車主摒棄咗原車雙邊單出嘅設計，選擇咗一套來自DAIANDONG嘅單邊直出，不同平時見到嘅「大砲」，哩套中至尾部份都是根據車主需求, 在設計上會使整體聲音較為低調，日常駕駛相當舒適。不過係轉速上4000後，聲音就會頗為澎湃。
「港車北上」嘅陣形裡面，CL7可以講係非常常見嘅，特別係周末時間，一家大細或者三五之間一起過去GIC賽車場玩下賽道日嘉年華，確實係唔錯嘅娛樂活動。不過一部分Hardcore玩家可能會話，落Track肯定要搞到部車足曬料，夠戰鬥先去嘅啦！不過其實小弟想講嘅係，專業嘅車自然有對應組別嘅Track Day俾你去玩，其實都有會唔少嘅「娛樂」Track Day俾大家選擇，所以，大家唔一定真係要做曬非常Hardcore嘅改造先去玩，做啲基礎升級，偶爾落場玩下，也是提升下車技訓練。
鳴謝：偉光汽車服務