
據外媒報導,採用Neue Klasse設計語言嘅第八代BMW 3系正式揭曉,廠方公佈咗320i、M350i xDrive汽油版本,以及全新純電i3等配置,不過成份資料完全冇提及油渣版本,唔少歐洲車迷得知哩個消息之後都感到意外。事關由E30世代開始,每一代3系於歐洲市場都會提供至少一款油渣引擎,呢個傳統已經維持超過四十載,今次一刀切取消,可以講係3系歷史上一個重要嘅轉折點。

新一代3系全面換上Neue Klasse設計,同一副車身覆蓋汽油、純電同埋日後嘅插電混能等唔同動力,車廂亦配備全新Panoramic iDrive。汽油陣營主打兩款車型:後驅320i配搭新一代TwinPower Turbo兩公升四缸,加入48V輕混,最大馬力211匹,扭力330牛·米,0-100km/h需時7.4秒,英國售價由44,975英鎊起;旗艦M350i xDrive則使用三公升直列六缸,綜合輸出443匹、580牛·米,比上一代多咗69匹,0-100km/h只需4.1秒,極速電子鎖定喺250km/h,仲加入咗源自M車型嘅Drift Moment後輪甩尾模式,2027年先會透過軟件更新開放。純電方面,i3分為40 xDrive同50 xDrive兩個版本,前者374匹、82.8kWh電池、WLTP續航約710公里,後者469匹、645牛·米、108.7kWh電池、續航高達911公里,800V平台支援400kW快充,帳目數據上可以講相當驚人,2027年仲會有M Performance定位嘅i3 M60 xDrive加入陣營。
至於油渣,3系同油渣嘅淵源其實早過好多人想像,早喺E30年代廠方已經推出過油渣版本,之後每一代都有油渣型號撐場,油渣更一度係歐洲市場嘅銷售主力,尤其係英國、德國同意大利嘅用家,特別鍾意油渣版嘅長途巡航能力同低油耗,香港市場嘅油渣寶馬數量都相當可觀。上一代G20車系嘅代表就係320d,搭載B47兩公升渦輪柴油四缸,最大馬力188匹,扭力達400牛·米。呢部車向來係歐洲市場熱門選擇,兼顧靈活動力、後驅佈局同埋不俗油耗表現。除咗普通版本之外,歐洲市場亦有M340d,使用三公升雙渦輪直六柴油,輸出340匹馬力,扭力高達700牛·米,扭力表現甚至比現行M3 Competition嘅650牛·米更為強橫。廠方確認,現有G20柴油車型會繼續銷售多幾個月,直至新一代車型正式投產為止。

對於取消油渣嘅原因,BMW官方未有直接講明,但業界普遍認為歐7排放法規令油渣引擎喺歐洲嘅開發生產難度同成本大大提升,繼續投資落去未必划算。按照BMW Blog嘅講法,之後會由插電混能版本填補油渣車留下嘅市場位置,同時兼顧性能同燃油經濟性。有關新插混3系嘅詳細參數目前公開資料唔多,預計會喺下一年度正式登場,外界估計新車會沿用熟識嘅B48兩公升渦輪四缸,配合電機同大容量電池,純電行車里程有機會達到大約100公里。

生產安排方面,純電i3會喺BMW慕尼黑工廠生產,今年八月已經開始量產;汽油版320i同M350i xDrive則會喺今年十一月起於Dingolfing工廠投產,電機同引擎就由奧地利製造,新一代電池則由巴伐利亞州新建嘅I工廠供應。今次改動之後,好多歐洲忠實用家都有唔同睇法,一部分人覺得插混可以承接油渣長途優勢,亦有車迷認為油渣嘅大扭力同低油耗特質,係現有插混都難以完全取代。對於一班長年追捧油渣3系嘅車迷更為緊要嘅係,日後旅行版Touring會唔會重啟柴油動力,仍然係一個未知之數。
圖片均來自網絡,觀點僅代表作者個人;如果冒犯倍感抱歉,請立刻聯繫我們。




